హార్దిక్ రాక.. టైటిల్ వేటలో మా కీలక ముందడుగు: పంజాబ్ కింగ్స్ సీఈవో

ఇండియన్ ప్రీమియర్ లీగ్ (ఐపీఎల్)లో తొలి టైటిల్ కోసం ఎదురుచూస్తున్న పంజాబ్ కింగ్స్ జట్టు, ఆ దిశగా కీలక ముందడుగు వేసింది. స్టార్ ఆల్‌రౌండర్ హార్దిక్ పాండ్య జట్టులోకి రావడం తమ టైటిల్ వేటలో చాలా ముఖ్యమైన పరిణామమని పంజాబ్ కింగ్స్ సీఈవో సతీశ్ మేనన్ అభివర్ణించారు. ఐపీఎల్ 2027 సీజన్‌కు ముందు ముంబై ఇండియన్స్, పంజాబ్ కింగ్స్ మధ్య జరిగిన భారీ ప్లేయర్ ట్రేడ్‌లో ఈ మార్పు చోటుచేసుకుంది.

ఈ ఒప్పందంలో భాగంగా హార్దిక్ పాండ్య రూ. 18 కోట్ల ఫీజుతో పంజాబ్ కింగ్స్‌కు బదిలీ కాగా, పంజాబ్ స్టార్ పేసర్ అర్ష్‌దీప్ సింగ్ అంతే మొత్తానికి ముంబై ఇండియన్స్‌కు వెళ్లాడు. ముంబై ఇండియన్స్‌లో రూ. 16.35 కోట్లుగా ఉన్న హార్దిక్ వేతనం, ఈ కొత్త ఒప్పందంతో పెరిగింది. 2024 నుంచి ముంబై జట్టుకు కెప్టెన్‌గా ఉన్న హార్దిక్, ఈ ట్రేడ్‌తో ఆ జట్టుతో తన ప్రయాణాన్ని ముగించాడు.

ఇప్పటికే ఐదు ఐపీఎల్ టైటిళ్లు (ముంబైతో 4, గుజరాత్‌తో 1) గెలిచిన హార్దిక్, పంజాబ్ కింగ్స్‌లో కెప్టెన్ శ్రేయస్ అయ్యర్ నాయకత్వంలో ఆడనున్నాడు. జట్టులో చేరిన అనంతరం సోషల్ మీడియాలో స్పందించిన హార్దిక్, కెప్టెన్ శ్రేయస్ అయ్యర్, కోచ్ రికీ పాంటింగ్‌కు తాను అండగా ఉంటానని పేర్కొన్నాడు. మరోవైపు 8 సీజన్ల పాటు పంజాబ్‌కు ఆడి, 96 మ్యాచ్ లలో 111 వికెట్లతో ఆ జట్టు తరఫున ఆల్-టైమ్ లీడింగ్ వికెట్ టేకర్‌గా ఉన్న అర్ష్‌దీప్ సింగ్, ఇకపై ముంబై ఇండియన్స్ తరఫున ఆడనున్నాడు.