గాలి కాలుష్యం దెబ్బ.. అండాలు, వీర్యకణాలపైనా ప్రభావం!

నగరాల్లో పెరుగుతున్న వాయు కాలుష్యం ఊపిరితిత్తులకే కాదు.. సంతానోత్పత్తి ఆరోగ్యానికీ ముప్పుగా మారుతోందా? ముఖ్యంగా ఫెర్టిలిటీ పరీక్షల్లో వచ్చే ఫలితాలపై కాలుష్యం ప్రభావం చూపిస్తోందా? ఇటీవలి పరిశోధనలు ఈ ప్రశ్నలకు ఆసక్తికరమైన సమాధానాలు చెబుతున్నాయి. గాలిలోని సూక్ష్మ ధూళి కణాలు, ప్లాస్టిక్ ఉత్పత్తుల్లో ఉండే కొన్ని రసాయనాలు హార్మోన్ల పనితీరు, అండాల నాణ్యత, వీర్యకణాల ఆరోగ్యంపై ప్రభావం చూపే అవకాశముందని అధ్యయనాలు వెల్లడిస్తున్నాయి. అయితే పరీక్షల్లో వచ్చే ప్రతికూల ఫలితాలకు కాలుష్యమే కారణమని నిర్ధారించలేమని నిపుణులు స్పష్టం చేస్తున్నారు.

మహిళల హార్మోన్లపై ప్రభావం
2026లో 'కమ్యూనికేషన్స్ మెడిసిన్' జర్నల్‌లో ప్రచురితమైన అధ్యయనం 1,79,972 మంది మహిళల వివరాలను విశ్లేషించింది. భారత్‌లో నిర్ణయించిన ప్రమాణం కంటే ఎక్కువగా పీఎం2.5 కాలుష్యానికి గురైన మహిళల్లో రుతుస్రావం ఆలస్యంగా ప్రారంభమయ్యే అవకాశాలు 24 శాతం ఎక్కువగా ఉన్నట్లు గుర్తించింది. అలాగే ముందుగానే మెనోపాజ్ వచ్చే ముప్పు 23 శాతం అధికంగా ఉన్నట్లు వెల్లడించింది. అయితే ఇది పరిశీలనాత్మక అధ్యయనం మాత్రమే. కాలుష్యమే ఈ మార్పులకు కారణమని నిర్ధారించలేదు.

అండాల నాణ్యతపైనా ప్రభావం?
ప్లాస్టిక్ వస్తువులు, కొన్ని వ్యక్తిగత సంరక్షణ ఉత్పత్తుల్లో ఉండే థాలేట్స్‌ హార్మోన్ల పనితీరును దెబ్బతీసే రసాయనాలుగా గుర్తింపు పొందాయి. 2024లో 245 మంది భారతీయ మహిళలపై జరిగిన అధ్యయనంలో ఈ రసాయనాలకు సంబంధించిన కొన్ని పదార్థాలు అండాశయ నిల్వ సామర్థ్యం, అండాల సేకరణ ఫలితాలతో సంబంధం కలిగి ఉన్నట్లు తేలింది. అయితే అన్ని రసాయనాల విషయంలో ఒకే తరహా ఫలితాలు కనిపించలేదు.

వీర్యకణాలపైనా ప్రభావం
కాలుష్యం పురుషుల సంతానోత్పత్తి సామర్థ్యాన్నీ ప్రభావితం చేసే అవకాశం ఉంది. తైవాన్‌లో 6,475 మంది పురుషులపై 2018లో జరిగిన అధ్యయనం ప్రకారం.. పీఎం2.5 స్థాయులు ప్రతి ఐదు మైక్రోగ్రాములు పెరిగినప్పుడు సాధారణ ఆకృతిలో ఉండే వీర్యకణాల శాతం 1.29 తగ్గినట్లు గుర్తించారు. అయితే వీర్యకణాల సంఖ్య మాత్రం పెరిగినట్లు అధ్యయనం వెల్లడించింది. అంటే కాలుష్య ప్రభావం అన్ని అంశాలపై ఒకేలా ఉండదని స్పష్టమవుతోంది.

కాలుష్యానికి దూరంగా ఉండేందుకు..
ఇంట్లో హెచ్‌ఈపీఏ ఫిల్టర్లు ఉన్న ఎయిర్‌ ప్యూరిఫయర్లు వాడటం, గాలి నాణ్యత సూచిక (ఏక్యూఐ) పరిశీలించి బయట వ్యాయామం చేయడం, అవసరమైనప్పుడు ఎన్‌95 మాస్కులు ధరించడం ద్వారా కాలుష్య ప్రభావాన్ని తగ్గించుకోవచ్చు. అయితే ఈ జాగ్రత్తలు పాటించడం వల్ల సంతానోత్పత్తి మెరుగవుతుందని ఇప్పటివరకు నిర్ధారణ కాలేదు.

పరీక్షల ఫలితాలే అంతిమం కాదు
వీర్యకణాల నాణ్యతలో మార్పులు కనిపిస్తే మరోసారి పరీక్ష చేయాల్సి రావచ్చు. అలాగే ఏఎంహెచ్‌ పరీక్ష ఫలితాలను వయసు, అల్ట్రాసౌండ్‌ వివరాలు, వైద్య చరిత్రతో కలిపి పరిశీలించాలి. వాహనాల పొగ, పారిశ్రామిక ధూళి, రసాయనాలకు ఎక్కువగా గురయ్యేవారు ఆ వివరాలను వైద్యులకు తెలియజేయాలి. అవసరమైతే అదనపు పరీక్షలు సూచిస్తారు. కాలుష్య ప్రభావంపై పరిశోధనలు కొనసాగుతున్నప్పటికీ.. ఒక్క పరీక్ష ఆధారంగా సంతానోత్పత్తి సామర్థ్యంపై నిర్ణయానికి రాకూడదని నిపుణులు సూచిస్తున్నారు.