విందులు.. ముద్దులు.. బిలియన్‌ డాలర్ల చిప్‌లు.. ఆలిస్‌-హువాంగ్‌ వ్యవహారంలో సంచలన వివరాలు!

ప్రపంచంలోనే అత్యంత ప్రభావవంతమైన టెక్నాలజీ సంస్థల్లో ఒకటైన ఎన్విడియా సీఈఓ జెన్సన్‌ హువాంగ్‌కు చైనాకు చెందిన వ్యాపారవేత్త ఆలిస్‌ హువాంగ్‌ ఎలా దగ్గరయ్యారు? విస్కీ విందుల నుంచి వ్యక్తిగత సాన్నిహిత్యం వరకు సాగిన ఈ పరిచయం వెనుక చైనా గూఢచర్య వ్యూహం ఉందా? ఇప్పుడు అమెరికా నిఘా వర్గాలను కలవరపెడుతున్న ప్రశ్నలివే. జెన్సన్‌తో సన్నిహిత సంబంధం ఏర్పరచుకుని ఆయన నుంచి కీలక సమాచారం సేకరించేందుకు, అంతర్జాతీయ ఏఐ రంగంలో ఆయన నిర్ణయాలను ప్రభావితం చేసేందుకు ఆలిస్‌ను చైనా నిఘా విభాగాలు ఉపయోగించుకున్నాయన్న అనుమానాలు వ్యక్తమవుతున్నాయి.

విస్కీ విందుతో మొదలైన పరిచయం
వీరిద్దరి పరిచయం కనీసం 2024 జూన్‌ నుంచే ఉన్నట్లు సమాచారం. తైవాన్‌లో జరిగిన ఓ టెక్నాలజీ ప్రదర్శన అనంతరం నిర్వహించిన విందులో జెన్సన్‌ హువాంగ్‌, ఆలిస్‌ కలిసి కనిపించారు. నెట్‌థండర్‌ అనే టెక్నాలజీ సంస్థ లింక్డిన్‌లో పంచుకున్న ఫొటోల్లో జెన్సన్‌ తనదైన నల్లటి లెదర్‌ జాకెట్‌లో కనిపించగా.. పక్కనే ఆలిస్‌ ఉన్నారు. పరిశ్రమకు చెందిన పలువురు ప్రముఖులు పాల్గొన్న ఆ సమావేశంలో ఇద్దరూ విస్కీ తాగుతూ కనిపించినట్లు కథనాలు పేర్కొన్నాయి.

2025 మేలో కంప్యూటెక్స్‌ టెక్నాలజీ ప్రదర్శన సందర్భంగా వీరి సాన్నిహిత్యం మరోసారి బయటపడింది. తైపీలోని ఓ చైనీస్‌ రెస్టారెంట్‌లో జెన్సన్‌ హువాంగ్‌ విందు ఏర్పాటు చేశారు. ఈ కార్యక్రమానికి ఆలిస్‌ కూడా హాజరయ్యారు. ఆమె జెన్సన్‌ పక్కనే కూర్చోవడం, ఆయన చెంపపై ముద్దు పెట్టడం, వీపుపై చేయి వేయడం వంటి దృశ్యాలు ఫొటోలు, ప్రత్యక్ష ప్రసార వీడియోల్లో కనిపించాయి. జెన్సన్‌ బయటకు వెళ్లి మీడియాతో మాట్లాడుతున్నప్పుడు ఆలిస్‌ కూడా ఆయన వెంట వెళ్లారు. అనంతరం ఇద్దరూ ఒకే కారులో అక్కడి నుంచి వెళ్లినట్లు సమాచారం. ఈ పరిణామాల నేపథ్యంలో వీరి మధ్య వ్యక్తిగత సంబంధంపై అమెరికా నిఘా వర్గాలు దృష్టి సారించాయి.

ఆలిస్‌ ఎవరు? మెగాస్పీడ్‌తో సంబంధమేంటి?
ఆలిస్‌ హువాంగ్‌ అసలు పేరు హువాంగ్‌ లే. చైనాలో టెలివిజన్‌ జర్నలిస్టుగా పనిచేసిన ఆమె.. ఆ తర్వాత టెక్నాలజీ రంగంలోకి ప్రవేశించారు. హెచ్‌ఎస్‌బీసీ, చైనా ప్రభుత్వ ప్రసార సంస్థ సీసీటీవీ, హునాన్‌ టీవీల్లో పనిచేసినట్లు ఓ చైనా ఫండ్‌ డేటాబేస్‌లో వివరాలున్నాయి. అయితే ఈ వివరాలను స్వతంత్రంగా నిర్ధారించలేకపోయినట్లు ఏఎఫ్‌పీ పేర్కొంది.

తర్వాత సింగపూర్‌కు చెందిన మెగాస్పీడ్‌ ఇంటర్నేషనల్‌లో సీనియర్‌ ఎగ్జిక్యూటివ్‌గా బాధ్యతలు చేపట్టారు. ఏఐ మోడళ్ల శిక్షణ, నిర్వహణ కోసం అవసరమైన కంప్యూటింగ్‌ సామర్థ్యాన్ని అద్దెకు అందించే సంస్థ ఇది. ఆసియా-పసిఫిక్‌ ప్రాంతంలో ఎన్విడియా కంప్యూటింగ్‌ క్లౌడ్‌ వ్యాపారానికి తాము కీలక భాగస్వాములమని మెగాస్పీడ్‌ తన వెబ్‌సైట్‌లో పేర్కొంది.

బిలియన్‌ డాలర్ల చిప్‌ లావాదేవీలు
మెగాస్పీడ్‌ వ్యాపార కార్యకలాపాలపైనా అమెరికా నిఘా సంస్థలు అనుమానాలు వ్యక్తం చేస్తున్నాయి. ఎన్విడియా నుంచి కొనుగోలు చేసిన అత్యాధునిక చిప్‌లను అమెరికా ఎగుమతి ఆంక్షలను ఉల్లంఘిస్తూ చైనాకు తరలించడంలో ఈ సంస్థకు పాత్ర ఉందేమోనని 2024 నుంచే పరిశీలిస్తున్నట్లు న్యూయార్క్‌ టైమ్స్‌ కథనం వెల్లడించింది. రెండేళ్ల వ్యవధిలో మెగాస్పీడ్‌ 4.8 బిలియన్‌ డాలర్లకు పైగా విలువైన ఎన్విడియా చిప్‌లను కొనుగోలు చేసినట్లు ఆ కథనం పేర్కొంది. 2025లో సింగపూర్‌ అధికారులు కూడా ఈ సంస్థపై దర్యాప్తులో భాగంగా ఆలిస్‌ను ప్రశ్నించినట్లు సమాచారం.

అమెరికా నిఘా వర్గాల అనుమానం
ఈ పరిణామాలన్నింటినీ కలిపి చూస్తున్న అమెరికా నిఘా వర్గాలు.. ఆలిస్‌ ద్వారా జెన్సన్‌ హువాంగ్‌కు చేరువై, ఆయన నుంచి కీలక సమాచారాన్ని సేకరించేందుకు చైనా ప్రయత్నించి ఉండొచ్చని అనుమానిస్తున్నాయి. ప్రపంచ ఏఐ చిప్‌ మార్కెట్‌లో కీలక స్థానంలో ఉన్న ఎన్విడియా అధినేత నిర్ణయాలను ప్రభావితం చేయడం కూడా ఈ వ్యూహంలో భాగమై ఉండొచ్చని భావిస్తున్నాయి. వీరిద్దరి మధ్య సన్నిహిత సంబంధంపై అమెరికా అధికారులు రహస్య నివేదిక రూపొందించి, ఉన్నతస్థాయి అధికారులకు పంపినట్లు ఫైనాన్షియల్‌ టైమ్స్‌ వెల్లడించింది.

అయితే, ఆలిస్‌ హువాంగ్‌ చైనా గూఢచర్య విభాగాల కోసం పనిచేశారన్న ఆరోపణలు ఇంకా నిర్ధారణ కాలేదు. చిప్‌ల అక్రమ బదిలీ ఆరోపణలను మెగాస్పీడ్‌ గతంలో ఖండించింది. తమ పరిశీలనలో ఎలాంటి తప్పిదాలు కనిపించలేదని ఎన్విడియా కూడా స్పష్టం చేసింది. అయినప్పటికీ.. విస్కీ విందులతో మొదలైన పరిచయం, బిలియన్‌ డాలర్ల చిప్‌ వ్యాపారంతో ముడిపడిన సంబంధాలు ఇప్పుడు అంతర్జాతీయ టెక్నాలజీ, నిఘా వర్గాల్లో చర్చనీయాంశమయ్యాయి.