టోల్‌గేట్ల మీదుగా తరచూ ప్రయాణించే స్థానికులకు కేంద్ర ప్రభుత్వం ఊరటనిచ్చింది. జాతీయ రహదారుల టోల్‌ ప్లాజాల సమీపంలో నివసించే ప్రైవేటు వాహనదారుల కోసం వార్షిక ఫాస్టాగ్‌ లోకల్‌ పాస్‌ను తీసుకొచ్చింది. టోల్‌ ప్లాజా ఉన్న ప్రాంతాన్ని బట్టి ఏడాదికి రూ.1,500 లేదా రూ.3,000 చెల్లిస్తే సరిపోతుంది. ఈ కొత్త విధానం నవంబర్‌ 1 నుంచి అమల్లోకి రానుంది. 

ఎవరు అర్హులు?
టోల్‌ ప్లాజాకు 20 కిలోమీటర్ల పరిధిలో నివసించే ప్రైవేటు వాహన యజమానులు ఈ పాస్‌కు అర్హులు. వాహనానికి చెల్లుబాటయ్యే, పనిచేస్తున్న నాన్‌ కమర్షియల్‌ ఫాస్టాగ్‌ ఉండాలి. అయితే ఈ అర్హతలు ఉన్నంత మాత్రాన పాస్‌ వస్తుందని భావించకూడదు. సర్వీస్‌ రోడ్డు లేదా ప్రత్యామ్నాయ రహదారి అందుబాటులో ఉన్న టోల్‌ ప్లాజాల వద్ద ఈ రాయితీ వర్తించదు. క్లోజ్డ్‌ టోల్‌ వసూలు విధానం ఉన్న జాతీయ రహదారులు, ఎక్స్‌ప్రెస్‌వేలపైనా ఈ పాస్‌ వర్తించదు. 

టోల్‌ ప్లాజా ఎక్కడ ఉంది? పాస్‌ ధర ఎంత?
టోల్‌ ప్లాజా మున్సిపల్‌ లేదా స్థానిక పట్టణ పరిధి వెలుపల ఉంటే ఏడాదికి రూ.1,500 చెల్లించాలి. ఆ పరిధిలో ఉంటే రూ.3,000 కట్టాలి. ఈ పాస్‌ తీసుకున్న టోల్‌ ప్లాజా వద్ద మాత్రమే ఉపయోగించుకోవచ్చు. మరో టోల్‌గేట్‌ వద్దకు మార్చుకోవడం కుదరదు. ఇప్పటికే ఉన్న నెలవారీ పాస్‌ విధానాన్ని కూడా వాహనదారులు ఎంచుకోవచ్చు. 

ఎలా పొందాలి?
నవంబర్‌ 1 నుంచి అర్హత ఉన్న టోల్‌ ప్లాజాల వద్ద ఈ వార్షిక పాస్‌ అందుబాటులోకి వస్తుంది. డిసెంబర్‌ 1 నుంచి రాజ్‌మార్గ్‌యాత్ర యాప్‌ ద్వారా కూడా పొందవచ్చు. ఈ పాస్‌ కోసం దరఖాస్తు చేసే ముందు తమ నివాసం నిర్దేశిత 20 కిలోమీటర్ల పరిధిలో ఉందో? లేదో? తాము ప్రయాణించే టోల్‌ ప్లాజాకు రాయితీ వర్తిస్తుందో? లేదో? నిర్ధారించుకోవాలి.