బెంగళూరులో సౌత్ ఇండియన్ ఇంటర్నేషనల్ మూవీ అవార్డ్స్ (సైమా) వేడుకలో ఓ ఊహించని అతిథి ప్రత్యేక ఆకర్షణగా నిలిచారు. టాలీవుడ్, కోలీవుడ్ తారల తళుకుబెళుకుల మధ్య, రాజకీయ, వ్యాపార ప్రముఖుల హడావుడిలో తెలంగాణ మాజీ మంత్రి, సీనియర్ బీఆర్ఎస్ నేత చామకూర మల్లారెడ్డి కోడలు ప్రీతి రెడ్డి సెంటరాఫ్ అట్రాక్షన్‌గా మారారు. సినీ పరిశ్రమతో నేరుగా ఎలాంటి సంబంధం లేకపోయినా, ఆమె ఈవెంట్‌లో అందరి దృష్టినీ తనవైపు తిప్పుకున్నారు.

హైదరాబాద్ పరిసర ప్రాంతాల్లోని మల్లారెడ్డి విద్యాసంస్థల్లో తరచూ సినిమా ఈవెంట్లు, షూటింగ్‌లు జరుగుతుంటాయి. ఈ నేపథ్యంలోనే సైమా నిర్వాహకులు ప్రీతి రెడ్డిని ఈ వేడుకకు ప్రత్యేకంగా ఆహ్వానించినట్లు సమాచారం. ఈవెంట్‌కు హాజరైన ప్రీతి రెడ్డి.. ఖరీదైన డిజైనర్ దుస్తుల్లో, స్టార్ హీరోయిన్లకు ఏమాత్రం తీసిపోని గ్లామర్‌తో రెడ్ కార్పెట్‌పై నడిచారు. ఆమె హొయలు, కెమెరాలకు ఇచ్చిన ఫోజులు చూసి అక్కడున్న వారంతా ఆశ్చర్యపోయారు. ఫోటోగ్రాఫర్లు, సోషల్ మీడియా ప్రతినిధులు ఆమెను తమ కెమెరాల్లో బంధించేందుకు పోటీపడ్డారు.

ప్రీతి రెడ్డి గ్లామరస్ లుక్‌పై ప్రస్తుతం సోషల్ మీడియాలో పెద్ద ఎత్తున చర్చ జరుగుతోంది. ఒక రాజకీయ కుటుంబం నుంచి వచ్చిన మహిళ, ఫ్యాషన్ ప్రపంచంలో ఇంతటి సంచలనం సృష్టించడంపై సినీ వర్గాలు కూడా ఇటువైపు దృష్టి సారించాయి. మొత్తానికి, ప్రీతి రెడ్డి సైమా ఎంట్రీ ఊహించని విధంగా ఓ ఫ్యాషన్ స్టేట్‌మెంట్‌గా నిలిచిపోయింది.