కోల్కతాలో సీజేపీ కార్యక్రమం రద్దు.. బీజేపీ బెదిరింపుల వల్లే హాల్ యజమానులు వెనక్కి తగ్గారన్న అశుతోష్ రంకా
- సీజేపీ నిర్వహించాల్సిన మీట్-అప్ కార్యక్రమం హఠాత్తుగా రద్దు
- బీజేపీ ఎంత ప్రయత్నించినా తమ పోరాటం ఆగదన్న సీజేపీ
- ఒక సీజేపీ కార్యకర్త తండ్రిపై దాడి.. మృతి
కాక్రోచ్ జనతా పార్టీ ఆధ్వర్యంలో కోల్కతాలో నిర్వహించాల్సిన ‘మీట్-అప్’ కార్యక్రమం హఠాత్తుగా రద్దయింది. ఉత్తర కోల్కతాలోని భారత్ సభా హాల్ యజమానులకు బీజేపీ నాయకుల నుంచి బెదిరింపులు రావడం, అలాగే ఇతర వేదికలపై ఒత్తిడి తీసుకురావడం వల్లే ఈ కార్యక్రమాన్ని రద్దు చేయాల్సి వచ్చిందని సీజేపీ జాతీయ అధికార ప్రతినిధి అశుతోష్ రంకా తీవ్ర ఆరోపణలు చేశారు.
ప్రభుత్వ పాఠశాలల్లో మౌలిక వసతులు, పరిస్థితులను పరిశీలించేందుకు సీజేపీ చేపట్టిన ‘స్కూల్ తీక్ కరో’ ప్రచారం నేపథ్యంలో ఈ మీట్-అప్ నిర్వహించ తలపెట్టారు. ఈ కార్యక్రమాన్ని అడ్డుకోవడానికి బీజేపీ ఎంత ప్రయత్నించినా, తమ పోరాటం ఆగదని, బెంగాల్లోని ప్రభుత్వ పాఠశాలల సమస్యలపై తాము నిరంతరం నిలదీస్తూనే ఉంటామని రంకా స్పష్టం చేశారు. అయితే, భారత్ సభా హాల్ నిర్వాహకులు మాత్రం సీజేపీ ముందస్తుగా హాల్ బుక్ చేసుకోలేదని, అందువల్లే వేదిక కేటాయించలేదని వివరణ ఇచ్చారు.
ఇదిలా ఉండగా, పశ్చిమ బెంగాల్లోని బంకురా జిల్లాలో ‘స్కూల్ తీక్ కరో’ ప్రచారంలో పాల్గొన్న ఒక సీజేపీ కార్యకర్త తండ్రిపై దాడి జరిగి, ఆయన మరణించిన ఘటన ఇటీవల తీవ్ర కలకలం రేపింది. ఈ నేపథ్యంలో కోల్కతా వేదికగా జరగాల్సిన మీట్-అప్ రద్దు కావడం రాజకీయంగా ప్రాధాన్యత సంతరించుకుంది.
