రాజమండ్రి సమీపంలో భారీగా గంజాయి పట్టివేత.. ఇద్దరి అరెస్ట్

తూర్పుగోదావరి జిల్లా రాజమండ్రి సమీపంలో పోలీసులు భారీగా గంజాయిని స్వాధీనం చేసుకున్నారు. సీలేరు ఏజెన్సీ ప్రాంతం నుంచి విజయవాడకు కారులో అక్రమంగా తరలిస్తున్న 25.970 కిలోల గంజాయిని పట్టుకుని, ఇద్దరు వ్యక్తులను అరెస్టు చేశారు.

ఈ కేసుకు సంబంధించిన వివరాల్లోకి వెళ్తే.. రాజానగరం పోలీస్ స్టేషన్ పరిధిలో పోలీసులు వాహన తనిఖీలు చేపట్టారు. ఈ క్రమంలో అనుమానాస్పదంగా ఉన్న ఒక కారును ఆపి సోదా చేయగా, మూడు పాలిథిన్ సంచుల్లో నిల్వ చేసిన గంజాయి లభ్యమైంది. స్వాధీనం చేసుకున్న గంజాయి విలువ సుమారు రూ.4.29 లక్షలు ఉంటుందని అధికారులు అంచనా వేశారు.

నిందితులను ఏలూరు జిల్లా కొయ్యలగూడెం మండలం సరిపల్లె గ్రామానికి చెందిన దులపల్లి సుజీవ్ కుమార్, మొదుగు నరేష్‌గా గుర్తించారు. వారి వద్ద నుంచి ఒక కారు, రెండు మొబైల్ ఫోన్లను పోలీసులు స్వాధీనం చేసుకున్నారు. ఈ గంజాయిని విజయవాడకు చెందిన చినంశెట్టి రాజేష్ అనే వ్యక్తికి చేరవేసేందుకు తరలిస్తున్నట్లు పోలీసుల విచారణలో తేలింది. సీలేరులో గంజాయిని సరఫరా చేసిన చింటూ అనే వ్యక్తితో పాటు రాజేష్ ప్రస్తుతం పరారీలో ఉన్నారని, వారి కోసం గాలిస్తున్నామని పోలీసులు తెలిపారు. ఈ ఘటనపై రాజానగరం పోలీసులు కేసు నమోదు చేసి దర్యాప్తు చేపడుతున్నారు.