రాజమండ్రిలో దారుణం: తాగుబోతుల కారు బీభత్సం.. వైద్య విద్యార్థిని బ్రెయిన్ డెడ్

ఆంధ్రప్రదేశ్‌లోని తూర్పుగోదావరి జిల్లా రాజమహేంద్రవరంలో దారుణ ఘటన చోటుచేసుకుంది. మద్యం మత్తులో కొందరు యువకులు కారుతో బీభత్సం సృష్టించిన ఘటనలో ఓ వైద్య విద్యార్థిని బ్రెయిన్ డెడ్‌కు గురయ్యారు. ఈ ఘటనకు సంబంధించి ఇద్దరు ఇంజినీరింగ్ విద్యార్థులను పోలీసులు అరెస్ట్ చేశారు.

జీఎస్ఎల్ మెడికల్ కాలేజీలో పీజీ చదువుతున్న ప్రియాంక (28), తన స్నేహితురాలితో కలిసి ఓ మాల్ నుంచి స్కూటీపై బయటకు వస్తున్నారు. మాల్ గేటు వద్దకు రాగానే, వెనుక నుంచి వేగంగా వచ్చిన కారు వారి స్కూటీని ఢీకొట్టింది. కిందపడిపోయిన వారిని చూసి గేటు వద్ద ఉన్న సిబ్బంది, స్థానికులు స్పందించేలోపే, కారు డ్రైవర్ మరోసారి వాహనాన్ని ముందుకు పోనిచ్చి ప్రియాంకపై నుంచి తొక్కించాడు. దీంతో ఆమె తలకు తీవ్ర గాయాలయ్యాయి. అనంతరం నిందితులు అక్కడి నుంచి వేగంగా పరారయ్యారు. ఈ ఘటన మంగళవారం జరగ్గా, సీసీటీవీ ఫుటేజ్ సోషల్ మీడియాలో వైరల్ కావడంతో గురువారం వెలుగులోకి వచ్చింది.

తీవ్రంగా గాయపడిన ప్రియాంకను మొదట స్థానిక ఆసుపత్రికి, ఆ తర్వాత మెరుగైన చికిత్స కోసం హైదరాబాద్‌కు తరలించారు. అక్కడ చికిత్స పొందుతూ ఆమె బ్రెయిన్ డెడ్‌కు గురైనట్లు వైద్యులు ప్రకటించారు.

పోలీసులు తెలిపిన వివరాల ప్రకారం, కారు నడుపుతున్న సూరవరపు దశవంత్, అతడి స్నేహితుడు ఆండ్రూ జోసెఫ్ ఎడ్వర్డ్స్‌ను అరెస్ట్ చేశారు. వీరిద్దరూ నమవరంలోని ఓ ఇంజినీరింగ్ కాలేజీలో చదువుతున్నారు. ఘటనకు ముందు మద్యం మత్తులో సినిమా చూసేందుకు మాల్‌కు రాగా, సిబ్బంది వారిని లోనికి అనుమతించలేదు. దీంతో సిబ్బందితో దురుసుగా ప్రవర్తించి, ఆ కోపంతోనే బయట ఈ ఘాతుకానికి పాల్పడినట్లు పోలీసులు తెలిపారు. నిందితులపై హత్యాయత్నం కేసుతో పాటు, మాల్ సిబ్బందితో అసభ్యంగా ప్రవర్తించినందుకు మరో కేసు నమోదు చేసినట్లు డీసీపీ ఎ.సుభాష్ వెల్లడించారు.