గూగుల్‌లో ఉద్యోగమే కాదు.. చేరాక ఎదగడమూ కష్టమే.. భారతీయ యువతి వీడియో వైరల్‌!

గూగుల్‌లో ఉద్యోగం అంటే చాలామందికి కల. కానీ అక్కడ చేరిన తర్వాత పరిస్థితులు ఎలా ఉంటాయి? పని ఒత్తిడి ఎలా ఉంటుంది? ఎదగడం ఎంత కష్టం? ఈ ప్రశ్నలకు అమెరికాలోని గూగుల్‌ ఆఫీసులో పనిచేస్తున్న భారతీయ ఉద్యోగిని ప్రియా తన అనుభవాలను పంచుకుంది. ఆమె వ్యాఖ్యలు ఇప్పుడు సోషల్‌ మీడియాలో వైరల్‌గా మారాయి.

ఉద్యోగంలో చేరిన తొలి రోజుల్లో తాను జీవితంలో అతిపెద్ద లక్ష్యాన్ని సాధించిన భావన కలిగిందని ప్రియా తెలిపింది. కంపెనీ పేరు, జీతం, ఉద్యోగం అన్నీ ఎంతో సంతోషం ఇచ్చాయని చెప్పింది. అయితే కొంతకాలం పనిచేసిన తర్వాత అక్కడి వాస్తవ పరిస్థితులు అర్థమయ్యాయని వివరించింది. గూగుల్‌లో అత్యంత ప్రతిభావంతులైన ఉద్యోగులు ఉండటంతో పదోన్నతులు, కెరీర్‌లో ఎదుగుదల చాలా పోటీతత్వంలో కూడుకొని ఉంటాయని చెప్పింది.

పని-వ్యక్తిగత జీవితం మధ్య సమతుల్యత మాత్రం గూగుల్‌లో బాగానే ఉంటుందని ప్రియా తెలిపింది. రోజూ 10 నుంచి 12 గంటలు పనిచేయాల్సి వస్తుందన్న ప్రచారం నిజం కాదని స్పష్టం చేసింది. కొన్ని రోజులు పని ఎక్కువగా ఉంటే.. మరికొన్ని రోజులు తక్కువగా ఉంటుందని చెప్పింది. అయితే ప్రమోషన్లు, పెద్ద బాధ్యతలు కోరుకునే వారు స్వచ్ఛందంగానే అదనపు సమయం పనిచేసేందుకు సిద్ధపడతారని వెల్లడించింది.

లండన్‌, చికాగో, న్యూయార్క్‌లో పనిచేసిన అనుభవాన్ని కూడా ఆమె వివరించింది. అమెరికాకు రావడం సరైన నిర్ణయమేనా అనే సందేహం ఒక దశలో కలిగిందని చెప్పింది. ఇప్పుడు వెనక్కి తిరిగి చూసుకుంటే అదే తన జీవితంలో అత్యుత్తమ నిర్ణయమని భావిస్తున్నట్లు తెలిపింది. ప్రియా వ్యాఖ్యలపై సోషల్‌ మీడియాలో మిశ్రమ స్పందనలు వ్యక్తమవుతున్నాయి.