గేమింగ్ ప్రియులకు శుభవార్త... ఎన్విడియా జీ ఫోర్స్ నౌ వచ్చేసింది.. ప్లాన్లు, ధరల పూర్తి వివరాలు!

భారతదేశంలోని గేమింగ్ ప్రియుల సుదీర్ఘ నిరీక్షణకు తెరపడింది. ప్రముఖ టెక్నాలజీ దిగ్గజం 'ఎన్విడియా' తన క్లౌడ్ గేమింగ్ సర్వీస్ 'జీ ఫోర్స్ నౌ'ను దేశవ్యాప్తంగా అధికారికంగా ప్రారంభించింది. జూలై 15వ తేదీ ఉదయం 7:30 గంటల నుంచి ఈ సేవలు పూర్తిస్థాయిలో అందుబాటులోకి వచ్చాయి. దీనివల్ల ఖరీదైన గేమింగ్ పీసీలు లేదా ల్యాప్‌టాప్‌లు లేకపోయినప్పటికీ, సాధారణ డివైజ్‌లలోనే అత్యున్నత స్థాయి (హై-ఎండ్) పీసీ గేమ్స్‌ను ఆడుకునే వీలు కలిగింది.

గత మూడు నెలలుగా కొనసాగుతున్న బీటా టెస్టింగ్ దశను విజయవంతంగా పూర్తి చేసిన ఎన్విడియా, ప్రస్తుతం ఈ సేవలను అందరికీ అందుబాటులోకి తెచ్చింది. ఇకపై ఈ సేవల కోసం ఎలాంటి వెయిట్‌లిస్ట్ అవసరం లేదు. వినియోగదారులు తమ స్టీమ్, ఎపిక్ గేమ్స్ స్టోర్, యుబిసాఫ్ట్ కనెక్ట్, ఎక్స్‌బాక్స్ వంటి ఖాతాలను నేరుగా జీ ఫోర్స్ నౌకు అనుసంధానించుకోవచ్చు. తద్వారా తాము ఇప్పటికే కొనుగోలు చేసిన 5,000కు పైగా గేమ్స్‌ను క్లౌడ్ సాంకేతికతతో స్ట్రీమ్ చేస్తూ ఆడుకోవచ్చు.

భారతీయ వినియోగదారుల కోసం ఎన్విడియా మొత్తం మూడు రకాల ప్లాన్లను ప్రకటించింది. ఉచిత ప్లాన్‌తో పాటు పెర్ఫార్మెన్స్ (నెలకి రూ. 999), అల్టిమేట్ (నెలకి రూ. 1,999) పేరుతో ప్రీమియం ప్లాన్లు ఉన్నాయి. వీటితో పాటు డే పాస్‌లు కూడా అందుబాటులో ఉన్నాయి. ఉచిత ప్లాన్‌లో గంటపాటు 1080p రిజల్యూషన్‌తో గేమ్స్ ఆడుకోవచ్చు. అదే పెయిడ్ ప్లాన్లలో అయితే అధిక రిజల్యూషన్, సుదీర్ఘ గేమింగ్ సమయం, రే ట్రేసింగ్, డీఎల్‌ఎస్‌ఎస్ 4 వంటి అత్యాధునిక ఫీచర్లు లభిస్తాయి. యూపీఐ ద్వారా కూడా సులభంగా చెల్లింపులు చేసే సదుపాయం ఉంది. బీటా వినియోగదారులకు మొదటి మూడు నెలల సబ్‌స్క్రిప్షన్‌పై 20 శాతం రాయితీని అందిస్తున్నట్లు కంపెనీ వెల్లడించింది.

ఎన్విడియా బ్లాక్‌వెల్ ఆర్కిటెక్చర్‌పై ఆధారపడిన అత్యంత శక్తిమంతమైన జీ ఫోర్స్ ఆర్టీఎక్స్ 5080 సర్వర్ల ద్వారా ఈ సేవలను అందిస్తోంది. వినియోగదారులకు కేవలం స్థిరమైన ఇంటర్నెట్ కనెక్షన్ (వైర్డ్ లేదా 5GHz వైఫై) ఉంటే సరిపోతుంది. దేశంలో గేమింగ్ పట్ల ఆసక్తి గణనీయంగా పెరుగుతున్న నేపథ్యంలో, హార్డ్‌వేర్ పరిమితులను అధిగమించి అందరికీ నాణ్యమైన గేమింగ్ అనుభూతిని అందించడమే లక్ష్యంగా జీ ఫోర్స్ నౌను ప్రవేశపెట్టినట్లు ఎన్విడియా స్పష్టం చేసింది.