'నేను యూపీ వాడిని.. అయోధ్యలో భూమి కావాలి': తెల్లవారుజామున 3 గంటలకు వ్యాపారికి అమితాబ్ ఫోన్ కాల్

బాలీవుడ్ మెగాస్టార్ అమితాబ్ బచ్చన్, పవిత్ర నగరమైన అయోధ్యలో తన పెట్టుబడులను గణనీయంగా విస్తరిస్తున్నారు. ఈ ఏడాది మార్చి నెలలో ఆయన రూ. 35 కోట్లతో 2.67 ఎకరాల భూమిని కొనుగోలు చేశారు. ఈ లావాదేవీని అమితాబ్ కంపెనీ ఏబీ కార్ప్ లిమిటెడ్ మేనేజింగ్ డైరెక్టర్ రాజేశ్‌ యాదవ్ పూర్తి చేశారు. అయోధ్యలో రామాలయ ప్రారంభోత్సవం తర్వాత రియల్ ఎస్టేట్ రంగంలో పెరుగుతున్న ఆసక్తికి ఇది నిదర్శనంగా నిలుస్తోంది.

ప్రముఖ రియల్ ఎస్టేట్ సంస్థ 'ది హౌస్ ఆఫ్ అభినందన్ లోధా' (HoABL) వ్యవస్థాపకుడు, ఛైర్మన్ అభినందన్ లోధా ఇటీవల జరిగిన 'హిందుస్థాన్ టైమ్స్ ఇండియా నెక్స్ట్ రియల్ ఎస్టేట్ సమ్మిట్ 2026'లో అమితాబ్‌తో తన సంభాషణను గుర్తుచేసుకున్నారు. 2023లో తాను ఆస్ట్రేలియాలో ఉన్నప్పుడు, అక్కడి కాలమానం ప్రకారం తెల్లవారుజామున 3 గంటలకు ఒక ఫోన్ కాల్ వచ్చిందని తెలిపారు.

"కొన్ని మిస్డ్ కాల్స్ తర్వాత, ‘ఇది అమితాబ్ బచ్చన్, వీలైనప్పుడు కాల్ చేయండి’ అని మెసేజ్ వచ్చింది. నేను ఆశ్చర్యపోయి వెంటనే లేచి నిలబడి ఆయనకు కాల్ చేశాను" అని లోధా వివరించారు. ఆ సంభాషణలో.. "'అభినందన్ జీ, నేను ఉత్తరప్రదేశ్‌కు చెందిన వాడిని. నాకు అయోధ్యలో భూమి కావాలి' అని అమితాబ్ తనతో చెప్పినట్లు లోధా తెలిపారు. ‘తప్పకుండా మీ కోసం ఏర్పాటు చేస్తాం’ అని తాను బదులిచ్చానన్నారు.

ఆ తర్వాత ధర గురించి అమితాబ్ అడగ్గా.. "'మీతో ధరల గురించి నేనెలా మాట్లాడగలను?' అని నేను సమాధానమిచ్చాను. తనకు 15,000 చదరపు అడుగుల స్థలం కావాలన్నారాయన. దాని విలువ సుమారు రూ. 15 కోట్లు ఉండొచ్చని చెప్పాను. ఆశ్చర్యకరంగా, ఆ మరుసటి రోజే ఆయన నాకు రూ. 15 కోట్లు పంపించారు" అని లోధా వెల్లడించారు.

అయోధ్యలో రామ మందిర ప్రారంభోత్సవానికి ముందే, 2024 జనవరిలో HoABL వారి ‘ది సరయు’ ప్రాజెక్ట్‌లో అమితాబ్ 10,000 చదరపు అడుగుల ప్లాట్‌ను కొనుగోలు చేశారు. అప్పటి నుంచి ఆయన అయోధ్యలో తన ఆస్తులను చురుగ్గా పెంచుకుంటున్నారు. తాజా కొనుగోలుతో కలిపి ఈ సంస్థ ద్వారా ఆయన అయోధ్యలో చేసిన మూడో పెట్టుబడి ఇది కాగా, నగరంలో మొత్తంగా నాలుగోది. ఇదే సంస్థకు చెందిన అలీబాగ్‌లోని 'సోల్ డి అలీబాగ్' ప్రాజెక్ట్‌లో కూడా బచ్చన్ పెట్టుబడి పెట్టారు.

ఈ సందర్భంగా అభినందన్ లోధా మాట్లాడుతూ.. "భూమి అనేది తరతరాలుగా విలువను కాపాడే ఆస్తి అనే నమ్మకాన్ని బచ్చన్ గారి పెట్టుబడి ప్రతిబింబిస్తుంది. అయోధ్యపై విశ్వాసం అనేది తరతరాలుగా పంచుకుంటున్న వారసత్వం. ప్రభుత్వ పెట్టుబడులు, మౌలిక సదుపాయాల అభివృద్ధి మద్దతుతో అయోధ్య దీర్ఘకాలిక భూ యాజమాన్యానికి, విలువ సృష్టికి ఒక ఆకర్షణీయమైన గమ్యస్థానంగా ఎదుగుతోంది" అని పేర్కొన్నారు.