హైదరాబాద్ వాసులకు శుభవార్త.. తిరుపతి, అరుణాచలం, శ్రీరంగానికి నేరుగా రైలు!

దక్షిణ భారతదేశంలోని ప్రముఖ పుణ్యక్షేత్రాలైన తిరుపతి, అరుణాచలం (తిరువణ్ణామలై), శ్రీరంగం సందర్శించాలనుకునే భక్తులకు దక్షిణ మధ్య రైల్వే శుభవార్త అందించింది. హైదరాబాద్‌లోని చెర్లపల్లి నుంచి తిరుచ్చి (తిరుచిరాపల్లి) వరకు నూతన వీక్లీ ప్రత్యేక రైలు సేవలను మంగళవారం నుంచి ప్రారంభించింది. ఈ రైలు సౌకర్యంతో భక్తులు ఒకే ప్రయాణంలో ఈ మూడు ముఖ్యమైన క్షేత్రాలను ఎంతో సులభంగా సందర్శించుకోవచ్చు.

రైలు నంబర్ 17077 ప్రతి మంగళవారం సాయంత్రం 5:20 గంటలకు చెర్లపల్లిలో బయలుదేరి, మరుసటి రోజు ఉదయం 8:50 గంటలకు తిరుపతికి, మధ్యాహ్నం 1:20 గంటలకు తిరువణ్ణామలైకి, సాయంత్రం 4:30 గంటలకు శ్రీరంగానికి చేరుకుంటుంది. అనంతరం సాయంత్రం 6:45 గంటలకు తిరుచిరాపల్లికి చేరుకుంటుంది. తిరుగు ప్రయాణంలో, రైలు నంబర్ 17078 ప్రతి బుధవారం రాత్రి 9:30 గంటలకు తిరుచ్చిలో బయలుదేరి, మరుసటి రోజు రాత్రి 10:20 గంటలకు చెర్లపల్లికి చేరుకుంటుంది.

హైదరాబాద్ నుంచి తిరుపతికి ఇప్పటికే సుమారు 20 రైళ్లు అందుబాటులో ఉన్నప్పటికీ, అరుణాచలానికి నేరుగా రైలు సౌకర్యం కల్పించాలని భక్తులు చాలాకాలంగా కోరుతున్నారు. ఈ కొత్త సర్వీసు ప్రారంభంతో వారి చిరకాల కోరిక నెరవేరినట్లయింది. మొత్తం 22 కోచ్‌లతో నడిచే ఈ రైలులో 3 సెకండ్ ఏసీ, 5 థర్డ్ ఏసీ, 10 స్లీపర్ క్లాస్, 4 జనరల్ సెకండ్ క్లాస్ బోగీలు అందుబాటులో ఉన్నాయి.