మెలోనీపై ట్రంప్ విచిత్రమైన మీమ్.. ఆమె నుంచి రక్షణ కావాలంటూ పోస్ట్!
- ఇటలీ ప్రధాని మెలోనీని టార్గెట్ చేస్తూ ట్రంప్ మీమ్ పోస్ట్
- ఆమె నుంచి తనకు 'రెస్ట్రెయినింగ్ ఆర్డర్' కావాలంటూ సంచలన వ్యాఖ్య
- జీ7 సదస్సులో ఫొటో కోసం మెలోనీ బతిమాలారని ట్రంప్ ఆరోపణ
- ట్రంప్ వ్యాఖ్యలు కల్పితమన్న మెలోనీ.. ఇటలీ ఎవరినీ బతిమాలదని స్పష్టీకరణ
- నాటో సదస్సులో భేటీ కానున్న నేపథ్యంలో ఇద్దరి మధ్య పెరిగిన ఉద్రిక్తత
టర్కీలో నాటో దేశాధినేతల సదస్సు జరగనున్న నేపథ్యంలో ఈ పోస్ట్ ప్రాధాన్యత సంతరించుకుంది. ఈ సదస్సులో ట్రంప్, మెలోనీ ముఖాముఖి భేటీ అయ్యే అవకాశం ఉంది. ట్రంప్ ఆదివారం చేసిన పోస్టులలో ఇది ఒకటి. ఇదే క్రమంలో మాజీ అధ్యక్షుడు బరాక్ ఒబామా, ఆయన భార్య మిషెల్ ఒబామాల నకిలీ చిత్రాన్ని కూడా ఆయన పంచుకున్నారు.
వివాదానికి దారి తీసిన జీ7 సదస్సు
గత వారం జరిగిన జీ7 సదస్సులో ఈ ఇద్దరు నేతల మధ్య వివాదం మొదలైంది. తనతో ఒక ఫొటో దిగేందుకు మెలోనీ పదేపదే అడిగారని, దాదాపు బతిమాలినట్టుగా ప్రవర్తించారని ట్రంప్ ఆరోపించారు. అంతేకాకుండా ఇంధనం, వలసల విషయంలో ఐరోపా దేశాలు పూర్తిగా తప్పుడు విధానాలు అవలంబిస్తున్నాయని, ఈ సమస్యలను పరిష్కరించకపోతే ఐరోపా భవిష్యత్తు అంధకారమవుతుందని ఆయన విమర్శించారు.
ట్రంప్ వ్యాఖ్యలపై ఇటలీ తీవ్రంగా స్పందించింది. ఇటలీ విదేశాంగ మంత్రి ఆంటోనియో తజానీ, నిరసనగా తన వాషింగ్టన్ పర్యటనను రద్దు చేసుకున్నారు. ట్రంప్ ఆరోపణలను జార్జియా మెలోనీ తీవ్రంగా ఖండించారు. "అవి పూర్తిగా కల్పితమైన ఆరోపణలు. ఇటలీ, నేను ఎప్పుడూ, ఎవరినీ బతిమాలం" అని ఆమె స్పష్టం చేశారు. "నేను అమెరికాకు వ్యతిరేకిని కాదు. పశ్చిమ దేశాలన్నీ ఐక్యంగా ఉంటేనే బలంగా ఉంటాయని నమ్మే వ్యక్తిని. అయితే, బలమైన సంబంధాలు నిక్కచ్చిగా మాట్లాడటంపై ఆధారపడి ఉంటాయి. నేను నిక్కచ్చైన వ్యక్తిని" అని మెలోనీ ఇటాలియన్ న్యూస్ ఏజెన్సీ అడ్న్క్రోనోస్కు ఇచ్చిన ఇంటర్వ్యూలో తెలిపారు.
ఈ వ్యక్తిగత ఆరోపణల వెనుక ఇతర భౌగోళిక రాజకీయ కారణాలు కూడా ఉన్నట్టు తెలుస్తోంది. ఇరాన్కు వ్యతిరేకంగా అమెరికా చేపడుతున్న చర్యలకు మద్దతిచ్చే విషయంలో ఇటలీ విముఖత చూపడం కూడా ఇరు దేశాల మధ్య సంబంధాలు దెబ్బతినడానికి ఒక కారణంగా విశ్లేషకులు భావిస్తున్నారు. ఈ నేపథ్యంలో జరగబోయే నాటో సదస్సులో ట్రంప్, మెలోనీల సమావేశంపై సర్వత్రా ఆసక్తి నెలకొంది.
