ఆస్ట్రేలియా బీచ్లో మిస్టరీ గోళాలు.. అంతరిక్షం నుంచి పడ్డాయా?
- ఆస్ట్రేలియా క్వీన్స్లాండ్ తీరంలో కొట్టుకొచ్చిన ఆరు గోళాలు
- ఇవి విదేశీ రాకెట్కు చెందిన శిథిలాలని ఆస్ట్రేలియన్ స్పేస్ ఏజెన్సీ అనుమానం
- రాకెట్ ఇంధన వ్యవస్థలోని 'స్పేస్ బాల్స్' కావచ్చన్న నిపుణుల అంచనా
- ప్రమాదకర రసాయనాలు ఉండవచ్చని ప్రజలను హెచ్చరించిన అధికారులు
- ప్రత్యేక సూట్లతో రంగంలోకి దిగి శిథిలాలను స్వాధీనం చేసుకుంటున్న సిబ్బంది
క్వీన్స్లాండ్ అగ్నిమాపక శాఖ ఇప్పటివరకు ఆరు వస్తువులను స్వాధీనం చేసుకుంది. వీటిలో ఐదింటిని అత్యంత జాగ్రత్తగా హానికర పదార్థాలను భద్రపరిచే డ్రమ్ములలో ఉంచగా, ఆరవ వస్తువును సురక్షితంగా తరలించేందుకు సిబ్బంది పనిచేస్తున్నారు. రానున్న రోజుల్లో మరిన్ని శిథిలాలు తీరానికి కొట్టుకువచ్చే అవకాశం ఉందని, అనుమానాస్పద వస్తువులు కనిపిస్తే వాటి దగ్గరకు వెళ్లవద్దని అధికారులు ప్రజలను హెచ్చరించారు. ప్రత్యేక రక్షణ సూట్లు ధరించిన అత్యవసర సిబ్బంది, ఈ లోహపు గోళాలను హాజ్మ్యాట్ కంటైనర్లలోకి తరలిస్తున్న దృశ్యాలు కనిపించాయి.
ఈ గోళాలు అంతరిక్ష నౌకలకు చెందిన ఇంధన ట్యాంకులు కావచ్చని, వాటిలో మండే స్వభావం ఉన్న పదార్థాలు ఉండవచ్చని ఆన్లైన్లో ఊహాగానాలు మొదలయ్యాయి. ఈ నేపథ్యంలో స్పేస్ ఆర్కియాలజిస్ట్, ఫ్లిండర్స్ యూనివర్సిటీ అసోసియేట్ ప్రొఫెసర్ అలైస్ గోర్మాన్ కీలక విషయాలు వెల్లడించారు. రాకెట్ ప్రయోగాల తర్వాత మిగిలిపోయే 'స్పేస్ బాల్స్' ఇవి కావచ్చని ఆమె అభిప్రాయపడ్డారు. సాధారణంగా అంతరిక్షం నుంచి భూ వాతావరణంలోకి ప్రవేశించే శిథిలాలపై ఉండే మచ్చలు, కాలిన గుర్తులు ఈ గోళాలపై కనిపించడం లేదని ఆమె విశ్లేషించారు.
"రాకెట్ మొదటి లేదా రెండవ దశ నుంచి ఇవి భూమిపై పడి ఉండవచ్చు. అందుకే వాటిపై కాలిన గుర్తులు లేవు. ఇవి రాకెట్ ఇంధన వ్యవస్థలో భాగమైన టైటానియం మిశ్రమలోహంతో చేసిన పీడన పాత్రలు. వీటిని 'స్పేస్ బాల్స్' అని పిలుస్తారు. ప్రయోగం జరిగిన చాలా ఏళ్ల తర్వాత కూడా ఇవి బయటపడవచ్చు" అని ఆమె వివరించారు.
తాజాగా ఆస్ట్రేలియన్ స్పేస్ ఏజెన్సీ విడుదల చేసిన ప్రకటనలో, ఇటీవల భూ వాతావరణంలోకి తిరిగి ప్రవేశించిన ఒక విదేశీ రాకెట్కు చెందిన శిథిలాలతో ఈ వస్తువుల లక్షణాలు సరిపోలుతున్నాయని పేర్కొంది. అత్యవసర నిర్వహణ అధికారులతో కలిసి ఈ ఘటనపై దర్యాప్తు కొనసాగిస్తున్నట్లు తెలిపింది.
