దలైలామాకు శుభాకాంక్షలు తెలిపిన చంద్రబాబు
- నేడు దలైలామా పుట్టినరోజు
- లోకానికి దయ, అహింస, కరుణ వంటి ఉన్నత విలువలను పరిచయం చేశారని కితాబు
- ఆయన నిండు నూరేళ్లు పూర్తి ఆరోగ్యంతో జీవించాలని ఆకాంక్ష
టిబెట్కు చెందిన బౌద్ధ మత గురువు దలైలామా జన్మదినాన్ని పురస్కరించుకుని ఆంధ్రప్రదేశ్ ముఖ్యమంత్రి చంద్రబాబు ఆయనకు ప్రత్యేక శుభాకాంక్షలు అందజేశారు. ఈ మేరకు సామాజిక మాధ్యమ వేదిక 'ఎక్స్' ద్వారా సీఎం ఒక సందేశాన్ని పంచుకున్నారు. దలైలామా నిండు నూరేళ్లూ పూర్తి ఆరోగ్యంతో, సంతోషంగా జీవించాలని ఆయన ఆకాంక్షించారు.
ప్రపంచవ్యాప్తంగా శాంతిని స్థాపించడంలో, మానవ హక్కుల రక్షణ కోసం దలైలామా అద్వితీయమైన సేవలు చేస్తున్నారంటూ ముఖ్యమంత్రి ఈ సందర్భంగా కొనియాడారు. లోకానికి దయ, అహింస, కరుణ వంటి ఉన్నతమైన విలువలను పరిచయం చేస్తూ.. దశాబ్దాలుగా కోట్లాది మందిలో దలైలామా స్ఫూర్తిని నింపుతున్నారని ప్రశంసించారు. సమాజంలో ద్వేషాన్ని వీడి, సోదరభావాన్ని పెంపొందించుకోవాలంటూ దలైలామా ఇచ్చిన సందేశాలు ఎప్పటికీ గుర్తిండిపోతాయన్నారు. ఈ పరమ పూజ్య గురువు గారు ఇలాగే మరిన్ని సంవత్సరాల పాటు సమాజానికి మార్గదర్శనం చేయాలని, ఆయనకు దైవ బలం, దీర్ఘాయుష్షు లభించాలని ఆ దేవుడిని ప్రార్థిస్తున్నట్టు తన సందేశంలో పేర్కొన్నారు.
