దేశం కోసం ఆడటం నా అదృష్టం.. ప్రతి ఒక్కరికీ ధన్యవాదాలు: వైభవ్ ఎమోషనల్ పోస్ట్
- ఇంగ్లండ్పై రెండో టీ20లో అరంగేట్రం చేసిన వైభవ్ సూర్యవంశీ
- సచిన్, షఫాలీ వర్మ రికార్డులను బద్దలు కొట్టిన 15 ఏళ్ల యువ సంచలనం
- దేశానికి ప్రాతినిధ్యం వహించడం గర్వంగా ఉందంటూ భావోద్వేగ పోస్ట్
- ఈ మ్యాచ్లో 4 వికెట్ల తేడాతో టీమిండియాపై ఇంగ్లండ్ విజయం
ఐర్లాండ్ పర్యటనలో అవకాశం దక్కకపోవడంతో నిరాశ చెందిన అభిమానులకు, ఇంగ్లండ్తో తొలి మ్యాచ్లోనూ వైభవ్ను పక్కన పెట్టడంతో ఎదురుచూపులు తప్పలేదు. అయితే, రెండో టీ20లో అవకాశం రావడంతో అతనిపై భారీ అంచనాలు నెలకొన్నాయి. ఈ మ్యాచ్లో అతను 10 బంతుల్లో 14 పరుగులు చేసి ఫర్వాలేదనిపించాడు. దురదృష్టవశాత్తు, ఈ మ్యాచ్లో టీమిండియా 4 వికెట్ల తేడాతో ఓటమి పాలైనప్పటికీ, వైభవ్ అరంగేట్రమే ప్రధాన చర్చనీయాంశంగా నిలిచింది.
మ్యాచ్ అనంతరం వైభవ్ సూర్యవంశీ సోషల్ మీడియాలో తన ఆనందాన్ని పంచుకున్నాడు. తన ప్రయాణంలో తనకు మద్దతుగా నిలిచిన అభిమానులు, సహచరులు, సీనియర్ ఆటగాళ్లకు కృతజ్ఞతలు తెలుపుతూ ఇన్స్టాగ్రామ్లో ఓ భావోద్వేగ పోస్ట్ పెట్టాడు. భారత జట్టు జెర్సీలో ఉన్న ఫొటోను షేర్ చేస్తూ.. "నాకు వస్తున్న సందేశాలు చూసి చాలా సంతోషంగా ఉంది. నాపై ప్రేమ, మద్దతు చూపిన ప్రతి ఒక్కరికీ, శ్రేయోభిలాషులకు, సీనియర్లకు ధన్యవాదాలు. దేశానికి ప్రాతినిధ్యం వహించే అవకాశం లభించడం నా అదృష్టం. జట్టు కోసం నా అత్యుత్తమ ప్రదర్శన ఇవ్వడానికి ఎప్పుడూ ప్రయత్నిస్తాను" అని రాసుకొచ్చాడు. ఈ పోస్ట్ క్షణాల్లో వైరల్ అయింది. దాంతో అభిమానులు అతనికి శుభాకాంక్షలు తెలిపారు.
ఇక, మ్యాచ్ విషయానికొస్తే.. తొలుత బ్యాటింగ్ చేసిన భారత్ నిర్ణీత 20 ఓవర్లలో 7 వికెట్లకు 190 పరుగులు చేసింది. అనంతరం 191 పరుగుల లక్ష్య ఛేదనలో ఇంగ్లండ్ తడబడింది. తొలి ఓవర్లోనే అర్ష్దీప్ సింగ్ రెండు వికెట్లు పడగొట్టినా, హ్యారీ బ్రూక్ (15 బంతుల్లో 39) మెరుపు ఇన్నింగ్స్తో ఇంగ్లండ్ తిరిగి పోటీలోకి వచ్చింది. జాకబ్ బెథెల్ (46 బంతుల్లో 76 నాటౌట్) అద్భుతమైన ఇన్నింగ్స్తో జట్టును విజయతీరాలకు చేర్చాడు. టామ్ బాంటన్ (39) కూడా కీలక పరుగులు చేశాడు. రవి బిష్ణోయ్ వేసిన 17వ ఓవర్లో రెండు నో-బాల్స్తో సహా 29 పరుగులు రావడం మ్యాచ్ను ఇంగ్లండ్ వైపు తిప్పింది. ఈ విజయంతో ఇంగ్లండ్ ఐదు మ్యాచ్ల సిరీస్ను 1-0తో ఆధిక్యంలో నిలిచింది.
