శివసేన 60వ స్థాపక దినోత్సవం వేళ భారీ తిరుగుబాటు.. ఉద్ధవ్ థాకరే చేతుల్లోంచి జారిపోతున్న పార్టీ!

మహారాష్ట్రలోని శివసేన ఉద్ధవ్ బాలాసాహెబ్ థాకరే వర్గంలో అంతర్గత సంక్షోభం మరింత ముదిరింది. జూన్ 19న పార్టీ 60వ వ్యవస్థాపక దినోత్సవం జరగాల్సి ఉండగా, అంతకంటే ముందే పార్టీకి చెందిన ఆరుగురు లోక్‌సభ ఎంపీలు తిరుగుబాటు జెండా ఎగరేశారు. ‘ఆపరేషన్ టైగర్’ పేరుతో సాగుతున్న ఈ రాజకీయ వ్యూహంలో భాగంగా, తమ పార్టీకి చెందిన మొత్తం తొమ్మిది మంది ఎంపీలలో ఆరుగురు విడిపోయి ప్రత్యేక గ్రూపుగా ఏర్పడటానికి, ఆపై ఏకనాథ్ షిండే వర్గంలో విలీనం కావడానికి వేగంగా పావులు కదుపుతున్నారు. వీరిలో ఇప్పటికే కనీసం నలుగురు ఎంపీలు తమను ప్రత్యేక గ్రూపుగా గుర్తించాలంటూ లోక్‌సభ స్పీకర్ ఓం బిర్లాకు లేఖ సమర్పించడం సంచలనం సృష్టిస్తోంది.

మరోవైపు ఈ సంక్షోభాన్ని ఎదుర్కొనేందుకు ఉద్ధవ్ థాకరే వర్గం రంగంలోకి దిగింది. తమ అనుమతి లేకుండా ఎలాంటి చీలిక వర్గాన్ని గుర్తించవద్దని స్పీకర్‌ను కోరుతూ, అత్యవసరంగా గురువారం ఉదయం ఢిల్లీలో పార్లమెంటరీ పార్టీ సమావేశాన్ని ఏర్పాటు చేసి ఎంపీలపై విప్ జారీ చేసింది. పార్టీ నమ్మకస్థులైన కీలక నేతలు సంజయ్ రౌత్, అరవింద్ సావంత్ తదితరులు స్పీకర్‌ను కలిసి తమ వాదనను బలంగా వినిపించారు. ఈ సందర్భంగా సంజయ్ రౌత్ విలేకరులతో మాట్లాడుతూ.. తమ ఎంపీలను లొంగతీసుకోవడానికి ఒక్కొక్కరికి రూ. 50 కోట్ల వరకు ఆఫర్ చేశారని, తీవ్రమైన బాహ్య ఒత్తిళ్లు తెస్తున్నారని సంచలన ఆరోపణలు చేశారు. జూన్ 22న ఉద్ధవ్ థాకరే పార్టీ పెద్దలందరితో కలిసి ఒక విస్తృత స్థాయి సమావేశాన్ని నిర్వహించి తదుపరి నిర్ణయం తీసుకోనున్నారు.

ప్రస్తుతం ఏకనాథ్ షిండే తన సీనియర్ నాయకులతో కలిసి ఢిల్లీలోనే మకాం వేసి, తిరుగుబాటు ఎంపీలతో చర్చలు జరుపుతున్నట్లు తెలుస్తోంది. షిండే వర్గ నాయకులు ఈ ఎంపీలను అసలైన శివసైనికులుగా అభివర్ణిస్తూ స్వాగతిస్తున్నప్పటికీ, విలీన ప్రక్రియపై ఇంకా అధికారిక ప్రకటన చేయలేదు. కొంతమంది ఎంపీలు ఇంకా లేఖపై సంతకాలు చేయాల్సి ఉండటంతో చిన్నపాటి సాంకేతిక ఇబ్బందులు ఎదురవుతున్నట్లు సమాచారం. ఒకవేళ ఈ తిరుగుబాటు విజయవంతమైతే పార్లమెంట్‌లో షిండే బలం 13కు చేరి కేంద్రంలోని అధికార కూటమిలో ఆయన పట్టు మరింత పెరగనుంది. 2022 నాటి శివసేన చీలికను గుర్తుకు తెస్తున్న ఈ పరిణామాలు మహారాష్ట్ర రాజకీయాలను ఏ మలుపు తిప్పుతాయో అన్నది లోక్‌సభ స్పీకర్ ఇచ్చే తీర్పుపైనే ఆధారపడి ఉంది.