బిహార్‌లోని గోపాల్‌గంజ్ జిల్లాలో దారుణ ఘటన చోటుచేసుకుంది. వివాహిత అయిన తన ప్రియురాలిని కలిసేందుకు వెళ్లిన ఓ యువకుడిని ఆమె కుటుంబ సభ్యులు దారుణంగా కొట్టి చంపారు. ఈ ఘటన స్థానికంగా తీవ్ర ఉద్రిక్తతకు దారితీసింది.

పోలీసుల కథనం ప్రకారం.. తూర్పు చంపారన్ జిల్లా మోతిహారికి చెందిన బాదల్ సింగ్ (23) అనే యువకుడికి, గోపాల్‌గంజ్ జిల్లాకు చెందిన కాజల్ కుమారి అనే వివాహితతో కొంతకాలంగా ప్రేమ వ్యవహారం ఉంది. భర్తతో విభేదాల కారణంగా కాజల్ ప్రస్తుతం తన పుట్టింట్లో ఉంటోంది. ఈ క్రమంలో శనివారం రాత్రి బాదల్ సింగ్.. ఆమెను కలిసేందుకు మాఝ్వాలియా గ్రామంలోని ఆమె ఇంటికి వెళ్లాడు.

అర్ధరాత్రి సమయంలో బాదల్‌ను గమనించిన కాజల్ కుటుంబ సభ్యులు, అతడిని పట్టుకుని చితకబాదారు. సమాచారం అందుకున్న పోలీసులు వెంటనే ఘటనా స్థలానికి చేరుకుని, తీవ్ర గాయాలతో ఉన్న బాదల్‌ను ఆసుపత్రికి తరలించారు. అయితే, చికిత్స పొందుతూ అతడు మృతి చెందినట్లు వైద్యులు ప్రకటించారు.

ఈ ఘటనపై కేసు నమోదు చేసుకున్న పోలీసులు, మృతదేహాన్ని పోస్టుమార్టం నిమిత్తం తరలించారు. ఫోరెన్సిక్ బృందం ఘటనా స్థలం నుంచి ఆధారాలు సేకరించింది. ఈ కేసుకు సంబంధించి కాజల్ కుమారిని, ఆమె తల్లిని అదుపులోకి తీసుకుని ప్రశ్నిస్తున్నట్లు గోపాల్‌గంజ్ సదర్ ఎస్డీపీవో-2 రాజేశ్ కుమార్ తెలిపారు. నిందితుల్లోని ఇతరుల కోసం గాలింపు చర్యలు చేపట్టినట్లు ఆయన వివరించారు. మృతుడి ఫోన్‌ను పరిశీలిస్తున్నామని, బాధితుడి కుటుంబం నుంచి అధికారిక ఫిర్యాదు అందిన తర్వాత తదుపరి చర్యలు తీసుకుంటామని పోలీసులు పేర్కొన్నారు.