రైల్లోనే ఆక్సిజన్ పైపుల సదుపాయం.. ప్రపంచంలోనే అత్యంత ఎత్తైన రైలు మార్గం విశేషాలివే!

రైలులో ప్రయాణించడానికి ఆక్సిజన్ పైపులు అవసరమవుతాయని ఎప్పుడైనా ఊహించామా? కానీ ఇది నిజం. చైనాలోని కింగ్హై-టిబెట్ రైల్వే మార్గంలో ప్రయాణం చేస్తే ఈ అనుభవం ఎదురవుతుంది. ప్రపంచంలోనే అత్యంత ఎత్తైన ఈ రైలు మార్గంలో ప్రయాణం ఒక సాహసయాత్రలా ఉంటుంది. టిబెట్ రాజధాని లాసా వరకు సాగే ఈ ప్రయాణంలో రైలు బోగీలు ఒక చిన్నపాటి ఆసుపత్రిని తలపిస్తాయి. ఇక్కడ ప్రతి ప్రయాణికుడికి ఆక్సిజన్ అందుబాటులో ఉంటుంది.

ఎందుకీ ఆక్సిజన్ వ్యవస్థ?
మొత్తం 1,956 కిలోమీటర్ల పొడవైన ఈ రైలు మార్గంలో ఎక్కువ భాగం సముద్ర మట్టానికి సుమారు 4,000 మీటర్ల (13,123 అడుగులు) ఎత్తులో ప్రయాణిస్తుంది. మార్గమధ్యంలో వచ్చే తంగులా పాస్ వద్ద ఇది గరిష్ఠంగా 5,072 మీటర్ల (16,640 అడుగులు) ఎత్తుకు చేరుకుంటుంది. ఇంత ఎత్తులో గాలిలో ప్రాణవాయువు (ఆక్సిజన్) స్థాయి సాధారణం కంటే 40 శాతం తక్కువగా ఉంటుంది. దీంతో ప్రయాణికులు శ్వాస తీసుకోవడంలో ఇబ్బంది పడకుండా, వారి భద్రత కోసం రైళ్లలో రెండు రకాల ఆక్సిజన్ సరఫరా వ్యవస్థలను ఏర్పాటు చేశారు.

మొదటిది 'డిస్పర్షన్ ఆక్సిజన్ సిస్టమ్'. ఇది రైలులోని ఎయిర్ కండిషనింగ్ ద్వారా అదనపు ఆక్సిజన్‌ను గాలిలోకి విడుదల చేస్తుంది. దీనివల్ల కోచ్‌లోని మొత్తం ఆక్సిజన్ స్థాయి 23.5 శాతానికి పెరుగుతుంది. సాధారణంగా గోల్ముడ్ (2,829 మీటర్ల ఎత్తు) స్టేషన్ దాటిన తర్వాత ఈ వ్యవస్థను ఆన్ చేస్తారు. ఇక రెండోది 'డైరెక్ట్ ఆక్సిజన్ అవుట్‌లెట్ సిస్టమ్'. దీని ద్వారా ప్రయాణికులు తమ సీటు లేదా బెర్త్ పక్కన ఉన్న అవుట్‌లెట్‌లకు చిన్న పైపులను కనెక్ట్ చేసుకొని నేరుగా ఆక్సిజన్ పీల్చుకోవచ్చు.

అద్భుతమైన ప్రకృతి దృశ్యాలు
ఈ ప్రయాణం కేవలం సాహసోపేతమే కాదు, ఎన్నో మరపురాని ప్రకృతి దృశ్యాలను కూడా అందిస్తుంది. బీజింగ్, షాంఘై, చెంగ్డు, క్సైనింగ్ వంటి నగరాల నుంచి లాసాకు ఈ రైలు సర్వీసులు అందుబాటులో ఉన్నాయి. ప్రయాణంలో విశాలమైన నీలాకాశం, తెల్లని మేఘాలు, యాక్ (జడల బర్రెలు), గొర్రెల మందలతో నిండిన పచ్చిక బయళ్లు కనువిందు చేస్తాయి. కున్‌లున్ వంటి మంచుతో కప్పబడిన పర్వత శ్రేణులు, యాంగ్జీ వంటి ప్రధాన నదులను దాటుకుంటూ రైలు ముందుకు సాగుతుంది. ప్రఖ్యాత హోహ్ జిల్ నేషనల్ నేచర్ రిజర్వ్ గుండా కూడా ఈ ప్రయాణం సాగుతుంది.

భారత్ నుంచి ప్రయాణం.. టికెట్ ధరలు
భారతదేశం నుండి లాసా వెళ్లాలనుకునే వారు ముందుగా ఢిల్లీ నుంచి బీజింగ్‌కు విమానంలో వెళ్లాల్సి ఉంటుంది. దీనికి సుమారు రూ. 55,000 ఖర్చవుతుంది. అక్కడి నుంచి లాసాకు రైలులో ప్రయాణించవచ్చు. రైలులో మూడు రకాల సీట్లు అందుబాటులో ఉన్నాయి. వాటి ధరలు ఇలా ఉన్నాయి:

సాఫ్ట్ స్లీపర్: ఇది అత్యంత సౌకర్యవంతమైంది. ఒక క్యాబిన్‌లో నాలుగు బెర్తులు, లాక్ చేసుకోగల డోర్, టేబుల్, టీవీ స్క్రీన్, ప్రతి బెర్త్‌కు ప్రత్యేక ఆక్సిజన్ అవుట్‌లెట్ ఉంటాయి. దీని ధర సుమారు 1144 చైనా యువాన్లు (రూ.675).

హార్డ్ స్లీపర్: ఒక కంపార్ట్‌మెంట్‌లో ఆరు బెర్తులు ఉంటాయి. దీనికి డోర్ ఉండదు. స్థలం కూడా కాస్త ఇరుకుగా ఉంటుంది. దీని ధర 720 యువాన్ల (రూ.425) నుంచి ప్రారంభమవుతుంది.

హార్డ్ సీట్: ఇది అత్యంత చవకైనది. సుదీర్ఘ ప్రయాణానికి సాధారణ సీటింగ్ మాత్రమే ఉంటుంది. దీని ధర సుమారు 360 యువాన్లు (రూ.212).

మొత్తం మీద కింగ్హై-టిబెట్ రైలు ప్రయాణం ఆధునిక ఇంజినీరింగ్ అద్భుతానికి, ప్రకృతి సౌందర్యానికి నిలువుటద్దంలా నిలుస్తుంది.