బాలీవుడ్‌లో ప్రతిష్ఠాత్మకంగా తెరకెక్కుతున్న 'రామాయణ' చిత్రంపై సర్వత్రా ఆసక్తి నెలకొంది. నితేశ్ తివారీ దర్శకత్వంలో రణ్‌బీర్ కపూర్ రాముడిగా నటిస్తున్న ఈ సినిమాపై పలు విమర్శలు వస్తున్న నేపథ్యంలో, రామానంద్ సాగర్ 'రామాయణ్' సీరియల్‌లో లక్ష్మణుడి పాత్రతో దేశవ్యాప్తంగా గుర్తింపు పొందిన నటుడు సునీల్ లహ్రీ స్పందించారు. సినిమాపై పూర్తి విశ్వాసం వ్యక్తం చేసిన ఆయన, సంగీతం విషయంలో మాత్రం కొద్దిగా నిరాశ చెందానని తెలిపారు.

ఈ విషయమై మంగళవారం తన ఎక్స్ ఖాతాలో సునీల్ లహ్రీ ఒక వీడియోను పంచుకున్నారు. అందులో ఆయన మాట్లాడుతూ.. "నితేశ్ తివారీ దర్శకత్వంలో వస్తున్న 'రామాయణ' త్వరలోనే ప్రేక్షకుల ముందుకు రానుంది. ఈ సినిమా గురించి నా అభిప్రాయం చెప్పాలని చాలామంది అడుగుతున్నారు. ఒకప్పుడు నేను కూడా రామాయణంలో భాగం కావడం వల్లే కావొచ్చు. ఆ కాలం వేరు, ఈ కాలం వేరు. నేను ఈ సినిమాను ఇంకా చూడలేదు. ఈ ఇతిహాసంపై నేను విమర్శకుడిని కాదు. ఇది కేవలం మన భారతీయులకే కాదు, ప్రపంచ మానవాళి మొత్తానికి గొప్ప కావ్యం" అని పేర్కొన్నారు.

అయితే, సంగీతం విషయంలో తన అసంతృప్తిని వ్యక్తం చేశారు. "ఈ చిత్రానికి ఏ.ఆర్.రెహమాన్, హాన్స్ జిమ్మర్ వంటి దిగ్గజాలు సంగీతం అందిస్తున్నా, నేను విన్న కొన్ని పాటలు, ధ్వనులు నన్ను కొద్దిగా నిరాశపరిచాయి. రామాయణ గాథలో సంగీతం వెన్నెముక లాంటిది. మిథిల, అయోధ్యకు సంబంధించిన స్థానికత ఆ సంగీతంలో కనిపించాలని నేను భావిస్తున్నాను. ఒక సాధారణ శ్రోతగా ఇది నా అభిప్రాయం మాత్రమే" అని వివరించారు.

సినిమా బృందాన్ని ప్రశంసిస్తూ "దర్శకుడు నితేశ్ జీ ఎన్నో మంచి సినిమాలు తీశారు. ఆయనపై, ఈ చిత్రంలోని నటీనటులపై నాకు పూర్తి నమ్మకం ఉంది. వారంతా కలిసి ఎంతో కష్టపడి ఒక మంచి చిత్రాన్ని అందిస్తారని ఆశిస్తున్నాను. ఇది చాలా పెద్ద బడ్జెట్‌తో తీస్తున్న సినిమా. దీని విజయం చాలా అవసరం. ఎందుకంటే ఎందరో జీవితాలు ఈ సినిమాపై ఆధారపడి ఉన్నాయి. ఈ చిత్రం ఘనవిజయం సాధించాలని దేవుడిని ప్రార్థిస్తున్నాను. జై శ్రీరామ్" అంటూ తన మాటలను ముగించారు.