సాఫ్ట్‌వేర్ ఉద్యోగం వదిలేసి, గంజాయి కొనేందుకు డబ్బుల్లేక ఏకంగా ఇంటిపైన గంజాయి పండించడం మొదలుపెట్టాడో టెక్కీ. ఈ అనూహ్య ఘటన హైదరాబాద్‌లోని నాచారం పోలీస్ స్టేషన్ పరిధిలో వెలుగుచూసింది. పోలీసుల కథనం ప్రకారం, నాచారం ఈస్ట్ గాంధీనగర్‌కు చెందిన సి. శశిధర్ అనే వ్యక్తి తన ఇంటి టెర్రస్‌పై గంజాయి సాగు చేస్తున్నాడు.

విశ్వసనీయ సమాచారం మేరకు శశిధర్ ఇంటిపై దాడి చేసిన పోలీసులు, అక్కడ పదుల సంఖ్యలో గంజాయి మొక్కలు ఉండటం చూసి ఆశ్చర్యపోయారు. టెర్రస్‌పై పెంచుతున్న 17 గంజాయి మొక్కలతో పాటు, సుమారు 10 కిలోల గంజాయిని స్వాధీనం చేసుకున్నారు.

నిందితుడిని విచారించగా ఆసక్తికరమైన విషయాలు వెల్లడయ్యాయి. గతంలో సాఫ్ట్‌వేర్ ఉద్యోగిగా పనిచేసిన శశిధర్, ఆ తర్వాత ఉద్యోగం మానేశాడు. గంజాయికి అలవాటుపడిన అతనికి, కొనుగోలు చేసేందుకు డబ్బులు లేకపోవడంతో తానే స్వయంగా పండించాలని నిర్ణయించుకున్నట్లు పోలీసుల విచారణలో తెలిపాడు. ఈ ఘటనపై కేసు నమోదు చేసుకున్న పోలీసులు శశిధర్‌ను అరెస్ట్ చేసి, దర్యాప్తు కొనసాగిస్తున్నారు.