గోపీచంద్ పై ఇప్పుడు వినిపిస్తున్న రూమర్ ఇదే!

గోపీచంద్ హిట్ అనే మాట విని చాలా కాలమైంది. ఆ మధ్య చేసిన 'పక్కా కమర్షియల్' తప్పకుండా తనకి హిట్ తెచ్చిపెడుతుందని గోపీచంద్ భావించాడు. కానీ ఆ సినిమా అభిమానులను నిరాశపరిచింది. ఆ తరువాత చేసిన 'రామబాణం' సినిమాపై కూడా ఆయన మరింత గట్టి నమ్మకాన్ని ఉంచుతూ వచ్చాడు. 

ఈ సినిమాకి శ్రీవాస్ దర్శకత్వం వహించాడు. గతంలో ఆయన కాంబినేషన్లో చేసిన 'లక్ష్యం' .. 'లౌక్యం' భారీ విజయాలను అందుకున్నాయి. అందువలన ఈ సారి హ్యాట్రిక్ హిట్ కొట్టడం ఖాయమని ఆయన అనుకున్నాడు. కానీ ఈ సినిమా కూడా ఆశించిన ఫలితాన్ని రాబట్టలేకపోయింది. చాలా తక్కువ ఓపెనింగ్స్ తెచ్చుకుని, గోపీచంద్ ను ఆలోచనలో పడేసింది. 

దాంతో ఇకపై తన పారితోషికాన్ని తగ్గించుకోవాలనే ఉద్దేశంతో గోపీచంద్ ఉన్నాడని అంటున్నారు. తన సన్నిహితులతో చర్చించే ఆయన ఈ నిర్ణయాన్ని తీసుకున్నాడని చెబుతున్నారు. ఇక స్టార్ హీరోల సినిమాల్లో విలన్ పాత్రలను చేయడానికి ఆయన సుముఖంగా ఉన్నాడంటూ ఒక రూమర్ బలంగానే వినిపిస్తోంది. చూడాలి మరి గోపీచంద్ ఏం చేస్తాడో.