ఆంధ్రప్రదేశ్ లో నోట్ల కట్టలు.. ఓ హాస్టల్ లో రూ.70 లక్షలు స్వాధీనం చేసుకున్న ఫ్లయింగ్ స్క్వాడ్!

సార్వత్రిక ఎన్నికల నేపథ్యంలో అధికారుల తనిఖీల్లో నగదు కట్టలుకట్టలుగా బయటపడుతోంది. తాజాగా ఆంధ్రప్రదేశ్ లోని ప్రకాశం జిల్లాలో భారీగా నగదును ఫ్లయింగ్ స్క్వాడ్ అధికారులు స్వాధీనం చేసుకున్నారు. జిల్లాలోని చీరాలలో ప్రసాదనగరంలో ఉన్న ఓ ప్రైవేటు హాస్టల్ లో నగదును దాచినట్లు ఫ్లయింగ్ స్క్వాడ్ కు సమాచారం అందింది. దీంతో అధికారులు ఈరోజు ఉదయాన్నే హాస్టల్ లో తనిఖీలు చేపట్టారు.

ఈ సందర్భంగా ఓ సంచిలో దాచిపెట్టిన రూ.70 లక్షల నగదును స్వాధీనం చేసుకున్నారు. ఈ వ్యవహారంపై కేసు నమోదు చేసిన పోలీసులు, హాస్టల్ యాజమాన్యాన్ని ప్రశ్నిస్తున్నారు. మరోవైపు తమిళనాడులోని పెరంబలూరులో ఈరోజు రూ.2.1 కోట్ల నగదును ఓ కారు డోరులో దాచి తరలిస్తుండగా అధికారులు స్వాధీనం చేసుకున్నారు.