సరిగమ వాదనతో ఏకీభవించిన సుప్రీంకోర్టు.. ఇళయరాజాకు ఎదురుదెబ్బ

ప్రముఖ సంగీత దర్శకుడు ఇళయరాజాకు సుప్రీంకోర్టులో ఎదురుదెబ్బ తగిలింది. దశాబ్దాల నాటి 'ఎన్ ఇనియ పొన్ నిలవే' పాట కాపీరైట్ హక్కుల వివాదంలో ఆయన దాఖలు చేసిన అప్పీల్‌ను సర్వోన్నత న్యాయస్థానం కొట్టివేసింది. ఈ విషయంలో ఢిల్లీ హైకోర్టు ఇచ్చిన తీర్పులో జోక్యం చేసుకోలేమని స్పష్టం చేసింది.

జస్టిస్ జె.బి. పర్దివాలా, జస్టిస్ కె. వినోద్ చంద్రన్‌లతో కూడిన ధర్మాసనం ఈ పిటిషన్‌పై విచారణ జరిపింది. 1980 నాటి తమిళ చిత్రం 'మూడు పానీ'లోని ఈ పాట ట్యూన్‌కు (సంగీతానికి) మాత్రమే ఇళయరాజాకు హక్కులు ఉంటాయని... పాట సాహిత్యం, సౌండ్ రికార్డింగ్‌పై ఆయనకు ఎలాంటి హక్కులు ఉండవని కోర్టు తేల్చిచెప్పింది.

సినిమా నిర్మాత నుంచి సౌండ్ రికార్డింగ్ హక్కులను పొందిన మ్యూజిక్ లేబుల్ 'సరిగమ'కు అనుకూలంగా ఢిల్లీ హైకోర్టు ఇచ్చిన తీర్పును సుప్రీంకోర్టు సమర్థించింది. 'అగతియా' అనే మరో సినిమాలో ఈ పాటను రీక్రియేట్ చేయడంతో ఈ వివాదం మొదలైంది. తాజాగా సుప్రీంకోర్టు తీర్పుతో ఈ కేసులో సరిగమ సంస్థకు పూర్తిస్థాయిలో న్యాయపరమైన ఉపశమనం లభించినట్లయింది.