'దేవాన్ష్ ఘాట్'పై మంత్రి లోకేశ్ సీరియస్.. కీలక ఆదేశాలు
- గోదావరి పుష్కర ఘాట్కు దేవాన్ష్ పేరు పెట్టడంపై వివాదం
- సోషల్ మీడియాలో విమర్శలు రావడంతో స్పందించిన మంత్రి లోకేశ్
- ఇది చాలా హాస్యాస్పదం అని, వెంటనే పేరు తొలగించాలని ఆదేశం
- విషయాన్ని తన దృష్టికి తెచ్చిన నెటిజన్లకు లోకేశ్ ధన్యవాదాలు
అసలేం జరిగింది?
తూర్పుగోదావరి జిల్లా, సీతానగరం మండలం మునికూడలిలో గోదావరి పుష్కరాల కోసం ఘాట్ను సిద్ధం చేస్తున్నారు. ఈ ఘాట్కు 'దేవాన్ష్ ఘాట్' అని పేరు పెట్టారు. ఇటీవల జిల్లా కలెక్టర్ కీర్తి చేకూరి ఈ ఘాట్ను పరిశీలించి, దీనిని 'మోడల్ గ్రామీణ పుష్కర ఘాట్'గా అభివృద్ధి చేయాలని ఆదేశించారు. ఈ ఘాట్ వద్ద దేవాన్ష్ పేరుతో ఉన్న బోర్డు ఫొటోలు, వీడియోలు సోషల్ మీడియాలో వైరల్ అయ్యాయి. ప్రభుత్వ కార్యక్రమానికి సీఎం కుటుంబ సభ్యుడి పేరు పెట్టడంపై నెటిజన్ల నుంచి తీవ్ర విమర్శలు వెల్లువెత్తాయి.
ఈ వివాదం మంత్రి నారా లోకేశ్ దృష్టికి వెళ్లడంతో ఆయన తక్షణమే స్పందించారు. ఏ ఘాట్కు కూడా దేవాన్ష్ పేరు పెట్టకూడదని స్పష్టమైన ఆదేశాలు జారీ చేశారు. ఈ విషయాన్ని తన దృష్టికి తీసుకొచ్చిన వారికి ఆయన ధన్యవాదాలు తెలిపారు. ప్రభుత్వంలో జవాబుదారీతనం, పారదర్శకత ముఖ్యమని చెప్పకనే చెప్పారు.
ఘాట్ అభివృద్ధి పనులు
ఉత్తరాంధ్ర జిల్లాల నుంచి వచ్చే భక్తుల సౌకర్యార్థం మునికూడలిలోని ఈ ఘాట్ను ప్రధాన కేంద్రంగా తీర్చిదిద్దుతున్నారు. ప్రస్తుతం 49 మీటర్లుగా ఉన్న ఘాట్ను 84 మీటర్లకు విస్తరించాలని కలెక్టర్ అధికారులను ఆదేశించారు. జూన్ 24న ఉప ముఖ్యమంత్రి పవన్ కల్యాణ్ పర్యటన నాటికి పనులు పూర్తి చేయాలని సూచించారు. భక్తుల కోసం తాగునీరు, దుస్తులు మార్చుకునే గదులు, మరుగుదొడ్లు, వైద్య శిబిరాలు వంటి సదుపాయాలు ఏర్పాటు చేయాలని కూడా స్పష్టం చేశారు. అయితే, కలెక్టర్ పరిశీలన తర్వాత ఈ పేరు వివాదం బయటకు రావడం, దానిపై మంత్రి లోకేశ్ తక్షణమే స్పందించి ముగింపు పలకడం గమనార్హం.
