ఆఫ్ఘనిస్థాన్‌లో తాలిబన్ ప్రభుత్వ ఏర్పాటు చట్ట విరుద్ధం: ఢిల్లీలోని ఆఫ్ఘన్ రాయబార కార్యాలయం

10-09-2021 Fri 09:26
  • మూడు రోజుల క్రితం మధ్యంతర ప్రభుత్వాన్ని ఏర్పాటు చేసిన తాలిబన్లు
  • పూర్తి స్థాయి ప్రభుత్వ కూర్పుపై దృష్టి
  • తాలిబన్ ప్రభుత్వ ఏర్పాటు ఆమోదయోగ్యం కాదన్న ఎంబసీ
Taliban government in Afghanistan is illegal Afghan embassy

గత నెలలో ఆఫ్ఘనిస్థాన్‌ను స్వాధీనం చేసుకున్న తాలిబన్లు మూడు రోజుల క్రితం మధ్యంతర ప్రభుత్వాన్ని ఏర్పాటు చేశారు. త్వరలోనే పూర్తిస్థాయి ప్రభుత్వాన్ని ఏర్పాటు చేయనున్నారు. ఈ మేరకు కొత్త ప్రభుత్వ ఏర్పాటు వేడుకకు హాజరు కావాల్సిందిగా పలు దేశాలను ఆహ్వానించనున్నట్టు సమాచారం.

ఈ నేపథ్యంలో ఢిల్లీలోని ఆఫ్ఘనిస్థాన్ రాయబార కార్యాలయం కీలక ప్రకటన చేసింది. తాలిబన్ల నేతృత్వంలో ఆఫ్ఘనిస్థాన్‌లో ఏర్పడిన ప్రభుత్వం చట్టబద్ధమైనది కాదని స్పష్టం చేసింది. ఈ మేరకు ‘ఇస్లామిక్ రిపబ్లిక్ ఆఫ్ ఆఫ్ఘనిస్థాన్ విదేశాంగ శాఖ’ పేర్కొంది. తాలిబన్లు కేబినెట్‌ను ఏర్పాటు చేయడం ఆమోదయోగ్యం కాదని పేర్కొంది. ఎన్నికల్లో ప్రజలు ఇచ్చిన తీర్పుకు ఇది పూర్తిగా వ్యతిరేకమని ఆందోళన వ్యక్తం చేసింది.

 కాగా, తాలిబన్లు కాబూల్‌ను ఆక్రమించుకున్న తర్వాత ఆ దేశాధ్యక్షుడు అష్రఫ్ ఘనీ పరారైన సంగతి తెలిసిందే. ఈ నేపథ్యంలో తాజా ప్రకటన ఆయన ప్రభుత్వ అభిప్రాయంగానే చెబుతున్నారు.