ఈరోజు తెరుచుకోనున్న శబరిమల.. భక్తులు తెలుసుకోవాల్సిన నిబంధనలు ఇవే!

16-10-2020 Fri 15:12
Sabarimala temple opens today with strict curbs
  • సాయంత్రం 5 గంటలకు తెరుచుకోనున్న శబరిమల ఆలయం
  • రేపు ఉదయం 5 గంటల నుంచి భక్తులకు అనుమతి
  • రోజుకు 250 మంది భక్తులకు మాత్రమే దర్శనం 

అయ్యప్ప శరణుఘోషతో మారుమోగే శబరిమల ఆలయం భక్తుల కోసం ఈరోజు తెరుచుకోనుంది. కరోనా నేపథ్యంలో మార్చి 24న లాక్ డౌన్ ప్రకటించినప్పటి నుంచి ఆలయంలోకి భక్తులను అనుమతించలేదు. నెలవారీ పూజాకార్యక్రమాల్లో భాగంగా ఈ సాయంత్రం 5 గంటలకు ఆలయాన్ని తెరవనున్నారు. అయితే రేపు (శనివారం) తెల్లవారుజామున 5 గంటల నుంచి భక్తులను ఆలయంలోకి అనుమతించనున్నట్టు ట్రావెంకోర్ దేవస్వోం బోర్డు ప్రకటించింది.

మరోవైపు, అయ్యప్ప దర్శనార్థమై వచ్చే భక్తులకు కేరళ ప్రభుత్వం పలు షరతులను విధించింది. భక్తులందరూ ఈ నిబంధనలను తెలుసుకోవాలని కోరింది.

అయ్యప్ప భక్తులకు విధించిన నిబంధనలు ఇవే:

  • ప్రతి ఒక్కరూ కరోనా నెగెటవ్ వచ్చిన రిపోర్టును తీసుకురావాలి. ఈ టెస్టును దర్శన సమయానికి 48 గంటల ముందు చేయించుకుని ఉండాలి.
  • నెగెటివ్ రిపోర్ట్ వచ్చిన తర్వాత దర్శనానికి సంబంధించి వర్చువల్ క్యూ పోర్టల్ లో పేరు నమోదు చేసుకోవాలి.
  • శబరి కొండను ఎక్కేందుకు అవసరమైన ఫిట్ నెస్ ఉన్నట్టు మెడికల్ సర్టిఫికెట్ తెచ్చుకోవాలి.
  • రోజుకు కేవలం 250 మంది భక్తులకు మాత్రమే అనుమతి ఉంటుంది.
  • 10 ఏళ్ల లోపు చిన్నారులకు, 60 ఏళ్లు దాటిన పెద్దలకు అనుమతి లేదు.
  • అయ్యప్పకు నెయ్యి అభిషేకం చేయడం, పంపా నదిలో స్నానాలు, సన్నిధానంలో రాత్రి బస చేయడానికి అనుమతించరు.
  • ఎరుమేలి, వడసెర్రికర మార్గాల్లో మాత్రమే భక్తులను అనుమతిస్తారు. ఇతర దారులను తాత్కాలికంగా మూసి ఉంచుతారు.