పాకిస్థాన్ మాజీ స్పిన్నర్ సయీద్ అజ్మల్ మరోసారి పాత వివాదాన్ని తెరపైకి తెచ్చాడు. 2011 ప్రపంచకప్ సెమీఫైనల్‌లో సచిన్ టెండూల్కర్‌ను అవుట్ చేసే విషయంలో డెసిషన్ రివ్యూ సిస్టమ్ (డీఆర్ఎస్)ను తారుమారు చేశారని ఆయన సంచలన ఆరోపణలు చేశాడు. తాజాగా ఒక వీడియోలో ఆయన చేసిన వ్యాఖ్యలు సోషల్ మీడియాలో చర్చనీయాంశమయ్యాయి.

2011 మార్చి 30న మొహాలీ వేదికగా భారత్, పాకిస్థాన్ మధ్య వరల్డ్ కప్ సెమీఫైనల్ జరిగింది. ఈ మ్యాచ్‌లో సచిన్ 23 పరుగుల వద్ద ఉన్నప్పుడు అజ్మల్ బౌలింగ్‌లో ఎల్బీడబ్ల్యూగా అంపైర్ ఇయాన్ గౌల్డ్ అవుట్ ఇచ్చాడు. అయితే, గౌతమ్ గంభీర్‌తో చర్చించిన అనంతరం సచిన్ రివ్యూ కోరాడు. బాల్ ట్రాకింగ్‌లో బంతి లెగ్ స్టంప్‌ను మిస్ అవుతున్నట్లు తేలడంతో థర్డ్ అంపైర్ నాటౌట్‌గా ప్రకటించాడు. ఈ అవకాశాన్ని సద్వినియోగం చేసుకున్న సచిన్, 115 బంతుల్లో 85 పరుగులు చేసి భారత విజయంలో కీలకపాత్ర పోషించాడు. ఆ మ్యాచ్‌లో భారత్ 29 పరుగుల తేడాతో గెలిచి ఫైనల్‌కు చేరింది.

ఈ ఘటనను గుర్తుచేసుకుంటూ అజ్మల్ ఇటీవల మాట్లాడుతూ, "అంపైర్ అవుట్ ఇచ్చాడు. గంభీర్ సూచనతో సచిన్ రివ్యూ తీసుకున్నాడు. ఇప్పటికీ నేను నమ్ముతున్నాను.. డీఆర్ఎస్ చివరి ఫ్రేమ్‌ను మార్చేశారు" అని వ్యాఖ్యానించాడు.

అజ్మల్ వ్యాఖ్యలపై సోషల్ మీడియాలో తీవ్ర వ్యతిరేకత వ్యక్తమవుతోంది. ఇది కేవలం కుట్ర సిద్ధాంతమని, కంప్యూటర్ ఆధారిత బాల్ ట్రాకింగ్‌ను మార్చడం అసాధ్యమని పలువురు నెటిజన్లు అభిప్రాయపడుతున్నారు. అజ్మల్ గతంలోనూ అనేకసార్లు ఇదే విధమైన ఆరోపణలు చేయడం గమనార్హం.