వివాదాల్లో ‘లక్ష్మీస్ ఎన్టీఆర్’.. రాంగోపాల్ వర్మపై కేసులు పెట్టేందుకు టీడీపీ నేతల సన్నాహాలు!

తెలుగుదేశం పార్టీ వ్యవస్థాపకుడు దివంగత ఎన్టీఆర్, ఆయన భార్య లక్ష్మీపార్వతి, ఏపీ సీఎం చంద్రబాబు ప్రధాన పాత్రలుగా ప్రముఖ దర్శకుడు రాంగోపాల్ వర్మ ‘లక్ష్మీస్ ఎన్టీఆర్’ సినిమాను తెరకెక్కించిన సంగతి తెలిసిందే. ఈ సినిమా ప్రమోషన్ లో భాగంగా ‘వెన్నుపోటు’ పాటను ఆయన నిన్న విడుదల చేశారు. కాగా, ఈ పాట ప్రస్తుతం వివాదానికి కేంద్ర బిందువు అయింది. రామ్ గోపాల్ వర్మ విడుదల చేసిన పాట ఏపీ ముఖ్యమంత్రి, టీడీపీ అధినేత చంద్రబాబును అవమానించేలా ఉందని టీడీపీ నేతలు ఆగ్రహం వ్యక్తం చేస్తున్నారు. దర్శకుడు వర్మతో పాటు నటీనటులు, ఈ సినిమాకు పనిచేసిన ఇతర నిపుణులపై ఏపీ అంతటా కేసులు పెట్టేందుకు సిద్ధమవుతున్నారు.

ఈ విషయమై టీడీపీ నేత ఎస్వీ మోహన్ రెడ్డి మీడియాతో మాట్లాడుతూ.. వెన్నుపోటు పాటలో చంద్రబాబును అనుచితంగా చూపారని మండిపడ్డారు. చంద్రబాబు ఫొటోలను వాడుకుని ముఖ్యమంత్రితో పాటు రాష్ట్ర ప్రతిష్టకు భంగం కలిగించేలా వ్యవహరించారని ఆరోపించారు. ఈ నేపథ్యంలో వర్మతో పాటు ఇతర చిత్ర యూనిట్ పై పరువు నష్టంతో పాటు క్రిమినల్ అభియోగాల కింద కేసు నమోదు చేయాలని పోలీసులకు ఫిర్యాదు చేశామన్నారు.

వర్మ ఒక్కడే ఈ పని చేశాడంటే నమ్మబుద్ధి కావడం లేదనీ, వెనుక ఉండి శిఖండి రాజకీయాలు చేస్తున్న వారిపై చర్యలు తీసుకోవాలని పోలీసులను కోరామన్నారు. ఈ వ్యవహారం వెనుక పెద్ద కుట్ర ఉందన్నారు. దమ్ముంటే సదరు నేతలు ముందుకొచ్చి చంద్రబాబును ఎదుర్కోవాలని సవాలు విసిరారు. ఈ వ్యవహారంపై ఏపీ అంతటా టీడీపీ శ్రేణులు కేసులు నమోదు చేస్తాయని హెచ్చరించారు.