శబరిమలలో టెన్షన్.. హోటల్స్ బుక్ చేసిన మహిళా సంఘాల నేతలు.. గవర్నర్ కు ఫిర్యాదు చేసిన ఎమ్మెల్యే జార్జ్!

కేరళలోని ప్రముఖ పుణ్యక్షేత్రం శబరిమలలో మరోసారి ఉద్రిక్త వాతావరణం నెలకొంది. అయ్యప్పస్వామి ఆలయాన్ని రేపు పూజల కోసం తెరవనున్న నేపథ్యంలో భక్తులు సైతం భారీగా చేరుకుంటున్నారు. ఈ సందర్భంగా మహిళా సంఘాలు ఆలయంలోకి వెళ్లేందుకు యత్నిస్తున్నట్లు వార్తలు రావడం కలకలం రేపుతోంది. ఆలయంలోకి వెళ్లేందుకు 10-50 ఏళ్ల మధ్య వయసున్న మహిళలు సిద్ధమైనట్లు స్థానిక ఎమ్మెల్యే జార్జ్ గవర్నర్ కు లేఖ రాశారు.

దీని కారణంగా అల్లర్లు చెలరేగే అవకాశముందని ఆందోళన వ్యక్తం చేశారు. వీరందరిని ఖాళీ చేయించాలని విజ్ఞప్తి చేశారు. ఈ నేపథ్యంలో నీలక్కల్ నుంచి పంబ వరకూ అధికారులు భారీగా పోలీసులను మోహరించారు. శబరిమల పరిసర ప్రాంతాల్లో 144 సెక్షన్ విధించారు. మరోవైపు నీలక్కల్ దగ్గరకు భారీ సంఖ్యలో చేరుకుంటున్న అయ్యప్ప భక్తులు 10-50 ఏళ్ల మధ్య వయసున్న మహిళలను అడ్డుకుని తీరతామని స్పష్టం చేస్తున్నారు.