అదే జరిగితే కొడుకని కూడా చూడను.. కుమారస్వామిని హెచ్చరించిన దేవెగౌడ!

కర్ణాటక మాజీ ముఖ్యమంత్రి కుమారస్వామికి ఆ పార్టీ జాతీయ అధ్యక్షుడు, మాజీ ప్రధాని దేవెగౌడ తీవ్ర స్థాయిలో హెచ్చరికలు జారీ చేశారు. బీజేపీతో జేడీఎస్ చేతులు కలపబోదని తేల్చి చెప్పారు. కుమారస్వామి కనుక ఒకవేళ ఆ పార్టీతో కుమ్మక్కైతే కుటుంబం నుంచి అతడిని వెలేస్తానని హెచ్చరించారు. బెంగళూరులోని తన నివాసంలో దేవెగౌడ మాట్లాడుతూ ఈ వ్యాఖ్యలు చేశారు.

కర్ణాటకలో ఏర్పడేది సంకీర్ణ ప్రభుత్వమేనని పలు సర్వేలు చెప్పాయని గుర్తు చేసిన ఆయన, అందుకే జేడీఎస్‌పై కుట్ర జరుగుతోందన్నారు. బీజేపీకి జేడీఎస్ బీ టీమ్ అని కాంగ్రెస్ చీఫ్ రాహుల్ ఆరోపించడాన్ని తప్పుబట్టారు. అమిత్ షాతో కలిసి కుమారస్వామి విమానంలో ప్రయాణించారన్న వార్తల్లో నిజం లేదన్నారు. కాంగ్రెస్ దిగజారుడు రాజకీయాలకు పాల్పడుతోందని, ఆధారాలు ఉంటే సిద్ధరామయ్య విడుదల చేయాలని సవాలు విసిరారు. కుమారస్వామి కనుక బీజేపీతో చేతులు కలిపేందుకు ప్రయత్నిస్తే కొడుకని కూడా చూడకుండా ఇంటి నుంచి వెళ్లగొడతానని, ఇంటి నుంచి, పార్టీ నుంచి వెలేస్తానని దేవెగౌడ హెచ్చరించారు.