అల్జీమర్స్, శ్వాసకోశ వ్యాధులతో నాన్నగారు తీవ్రంగా బాధపడ్డారు: రఘుబాబు

టాలీవుడ్ సీనియర్ నటుడు గిరిబాబు (80) తీవ్ర అనారోగ్యంతో కన్నుమూశారు. తన తండ్రి మరణ వార్తను ఆయన కుమారుడు రఘుబాబు మీడియా ముఖంగా ప్రకటించారు. ఈ సందర్భంగా ఆయన మీడియాతో మాట్లాడుతూ, తన తండ్రి మరణానికి గల కారణాలు తెలిపారు. "గత రెండున్నర, మూడేళ్లుగా నాన్నగారు అల్జీమర్స్, పార్కిన్సన్స్, ఊపిరితిత్తుల ఇన్‌ఫెక్షన్‌ వంటి సమస్యలతో తీవ్రంగా బాధపడ్డారు. గత ఆరు, ఏడు నెలలుగా పూర్తిగా మంచానికే పరిమితమయ్యారు. పరిస్థితి విషమించడంతో మూడు నాలుగు రోజుల క్రితం ఆసుపత్రిలో చేర్పించాం. శనివారం మధ్యాహ్నం బీపీ, షుగర్ లెవల్స్ పూర్తిగా పడిపోయి, 3 గంటల సమయంలో మరణించారు" అని కన్నీటిపర్యంతమవుతూ వెల్లడించారు. 

తండ్రి గిరిబాబు సినీ ప్రస్థానాన్ని గుర్తుచేసుకుంటూ రఘుబాబు తీవ్ర భావోద్వేగానికి లోనయ్యారు. "1973 నుంచి 2022 వరకు దాదాపు 47 ఏళ్ల పాటు నాన్నగారు ఇండస్ట్రీలో కొనసాగారు. తెలుగుతో పాటు ఇతర భాషల్లో కలిపి 650కి పైగా చిత్రాల్లో నటించారు. ఇండస్ట్రీకి వచ్చిన మూడేళ్లకే సొంత నిర్మాణ సంస్థను స్థాపించి, తెలుగులోనే మొట్టమొదటి బ్లాక్ అండ్ వైట్ సినిమాస్కోప్ చిత్రం 'దేవతలారా దీవించండి'ని నిర్మించి ఘన విజయం సాధించారు. ఆ తర్వాత కృష్ణగారితో 'సింహ గర్జన', అలాగే 'ఇంద్రజిత్' వంటి భారీ బడ్జెట్ చిత్రాలతో పాటు మురళీమోహన్, శ్రీధర్ వంటి నటులతో దాదాపు 10 సాంఘిక చిత్రాలను నిర్మించారు. ఆ తర్వాత నటనపైనే దృష్టి పెట్టి ప్రేక్షక దేవుళ్ల ఆదరణతో వందలాది చిత్రాలు పూర్తి చేశారు" అని రఘుబాబు వివరించారు.

నాన్నగారి మరణవార్త తెలియగానే పలువురు అగ్ర నటులు, నిర్మాతలు, దర్శకులు, సాంకేతిక నిపుణులు ఫోన్లలో తీవ్ర దిగ్భ్రాంతి వ్యక్తం చేశారని రఘుబాబు తెలిపారు. "ఎంతోమంది పెద్ద నటులు, హీరోలు ఫోన్ చేసి తమ సంతాపాన్ని తెలియజేశారు. షూటింగ్‌లు, ఇతర కారణాల వల్ల వేరే ప్రాంతాల్లో ఉండి రాలేకపోతున్నామని ఆవేదన వ్యక్తం చేశారు. ఆయనపై చూపించిన ప్రేమాభిమానాలకు అందరికీ చేతులెత్తి మొక్కుతున్నాను" అని రఘుబాబు పేర్కొన్నారు.

అనారోగ్య సమస్యల కారణంగా నవంబర్ 14 మధ్యాహ్నం హైదరాబాద్ కొండాపూర్‌లోని ఓ ప్రైవేటు ఆసుపత్రిలో చికిత్స పొందుతూ గిరిబాబు నేడు కన్నుమూశారు. ఆయన భౌతికకాయాన్ని అభిమానులు, సినీ ప్రముఖుల సందర్శనార్థం శనివారం రాత్రి 7 గంటల నుంచి 9 గంటల వరకు హైదరాబాద్‌లోని ఫిల్మ్ ఛాంబర్ ప్రాంగణంలో ఉంచారు. పరిశ్రమకు చెందిన పలువురు నటీనటులు, దర్శకులు, నిర్మాతలు తరలివచ్చి గిరిబాబు పార్థివదేహానికి నివాళులర్పించారు.

కాగా, గిరిబాబు అంత్యక్రియలు తమ స్వగ్రామంలో జరగనున్నట్లు రఘుబాబు తెలిపారు. ప్రకాశం జిల్లా మేదరమెట్ల సమీపంలోని రావినూతల గ్రామానికి భౌతికకాయాన్ని తరలించి, నవంబర్ 15 ఆదివారం మధ్యాహ్నం 3 గంటల తర్వాత నుంచి అంత్యక్రియల ఏర్పాట్లు చేయనున్నట్లు కుటుంబ సభ్యులు నిర్ణయించారని రఘుబాబు వెల్లడించారు.