అనిల్ రావిపూడితో జూనియర్ ఎన్టీఆర్.. అదిరిపోయే కాంబో.. పక్కా నవ్వుల బొనాంజా!

టాలీవుడ్ యంగ్ టైగర్ జూనియర్ ఎన్టీఆర్, వరుస విజయాలతో దూసుకుపోతున్న దర్శకుడు అనిల్ రావిపూడి కాంబినేషన్‌లో సరికొత్త చిత్రం పట్టాలెక్కనుంది. ఈ క్రేజీ ప్రాజెక్ట్‌ను శనివారం (నవంబర్ 14) ఎన్టీఆర్, అనిల్ రావిపూడి స్వయంగా ప్రకటించారు.

ఎక్స్ వేదికగా దర్శకుడు అనిల్ రావిపూడితో కలిసి ఉన్న ఫొటోను పంచుకున్న ఎన్టీఆర్, ఈ ప్రాజెక్ట్‌పై క్లారిటీ ఇచ్చారు. “ఈ చిత్రం ఒక నవ్వుల జాతరలా ఉండబోతోంది” (This one’s going to be a laugh riot) అని పేర్కొంటూ #NTRxAnilRavipudi అనే హ్యాష్‌ట్యాగ్‌ను జత చేశారు. ఈ పోస్ట్‌లో తన సోదరుడు నందమూరి కల్యాణ్ రామ్‌తో పాటు ఎన్టీఆర్ ఆర్ట్స్ నిర్మాణ సంస్థను కూడా ట్యాగ్ చేశారు.

ఈ చిత్రాన్ని నందమూరి కల్యాణ్ రామ్ ఎన్టీఆర్ ఆర్ట్స్ బ్యానర్‌పై నిర్మించనున్నారు. సాధారణంగా జూనియర్ ఎన్టీఆర్ హై-వోల్టేజ్ మాస్, యాక్షన్ కథాంశాలకు ప్రసిద్ధి చెందగా, అనిల్ రావిపూడి నాన్‌స్టాప్ కామెడీ ఎంటర్‌టైనర్లకు కేరాఫ్ అడ్రస్‌గా నిలిచారు. పూర్తి విరుద్ధమైన శైలులు కలిగిన ఈ ఇద్దరి కలయిక సినీ వర్గాలతో పాటు ప్రేక్షకుల్లోనూ భారీ ఆసక్తిని, ఉత్సాహాన్ని కలిగిస్తోంది.

ప్రస్తుతం జూనియర్ ఎన్టీఆర్ దర్శకుడు ప్రశాంత్ నీల్ కాంబినేషన్‌లో తెరకెక్కుతున్న ‘డ్రాగన్’ సినిమా చిత్రీకరణలో పాల్గొంటున్నారు. ఈ ప్రాజెక్ట్ పూర్తయిన వెంటనే అనిల్ రావిపూడి దర్శకత్వంలోని చిత్రం ప్రారంభం కానుంది. మరోవైపు, అనిల్ రావిపూడి ప్రస్తుతం వెంకటేశ్, కల్యాణ్ రామ్ కాంబినేషన్‌లో ఒక సినిమాను తెరకెక్కిస్తున్నారు. ఈ చిత్రం 2027 సంక్రాంతికి విడుదల కానుంది.

ఎన్టీఆర్, అనిల్ రావిపూడి సినిమా అధికారిక ప్రకటన వెలువడిన వెంటనే సోషల్ మీడియాలో #NTRxAnilRavipudi హ్యాష్‌ట్యాగ్ భారీగా ట్రెండ్ అవుతోంది. బాక్సాఫీస్ వద్ద ఈ నవ్వుల విందు సరికొత్త రికార్డులు సృష్టిస్తుందని అభిమానులు ఆశిస్తున్నారు. ఈ చిత్రానికి సంబంధించిన ఇతర నటీనటులు, సాంకేతిక బృందం మరియు రెగ్యులర్ షూటింగ్ వివరాలను చిత్ర యూనిట్ త్వరలోనే ప్రకటించనుంది.
.