రామ్‌లీలా మైదానంలో నిరసనలపై కొత్త రూల్స్.. 50 వేల మందికే అనుమతి, టైమ్ లిమిట్!

దేశ రాజధాని ఢిల్లీలోని చారిత్రక రామ్‌లీలా మైదానంలో నిరసనలు, ప్రదర్శనలు, ర్యాలీలు, బహిరంగ సభల నిర్వహణకు ఢిల్లీ పోలీసులు సరికొత్త మార్గదర్శకాలను ప్రతిపాదించారు. ఈ మేరకు ఒక ప్రామాణిక నిర్వహణ విధానం ముసాయిదాను రూపొందించి, ఉన్నతాధికారుల ఆమోదం కోసం పంపారు.

ఈ కొత్త నిబంధనల ప్రకారం రామ్‌లీలా మైదానంలో జరిగే ఏ కార్యక్రమానికైనా గరిష్ఠంగా 50,000 మంది మాత్రమే హాజరు కావడానికి అనుమతిస్తారు. అలాగే, ఉదయం 10 గంటల నుంచి సాయంత్రం 5 గంటల మధ్య, అంటే కేవలం ఏడు గంటల వ్యవధిలోనే కార్యక్రమాలను ముగించాల్సి ఉంటుంది.

ఈ ముసాయిదా ప్రకారం.. నిరసన కార్యక్రమాలను నిర్వహించాలనుకునే వారు కనీసం 10 రోజుల ముందుగానే పోలీసులకు దరఖాస్తు చేసుకోవాలి. అంతకుముందు ఢిల్లీ మున్సిపల్ కార్పొరేషన్ (ఎంసీడీ) నుంచి ‘వేదిక లభ్యత ధ్రువీకరణ పత్రం’ (Venue Availability Certificate) తప్పనిసరిగా పొందాలి. ఈ సర్టిఫికెట్‌ను దరఖాస్తుతో పాటు జత చేయాల్సి ఉంటుంది.

మైదానం మొత్తం సామర్థ్యం 50,000 అయినప్పటికీ, ప్రతి కార్యక్రమానికి హాజరయ్యే వారి సంఖ్యపై తుది నిర్ణయం సంబంధిత అధికారి తీసుకుంటారు. సభ స్వభావం, హాజరయ్యే జనాల అంచనా, భద్రతా ఏర్పాట్ల అవసరాన్ని బట్టి ఈ సంఖ్యను నిర్ధారిస్తారు.

భద్రత, శాంతిభద్రతల నిర్వహణకు సంబంధించి కూడా పలు కఠిన నిబంధనలను ఇందులో చేర్చారు. కార్యక్రమాల సందర్భంగా ట్రాఫిక్ నియంత్రణ, పార్కింగ్ ఏర్పాట్లపై నిర్వాహకులు పోలీసులతో సమన్వయం చేసుకోవాలి. అత్యవసర వాహనాల రాకపోకలకు ఉద్దేశించిన రహదారులను, ఫుట్‌పాత్‌లను ఎలాంటి పరిస్థితుల్లోనూ దిగ్బంధించకూడదని స్పష్టం చేశారు.

ప్రదర్శనలో పాల్గొనేవారు ఆయుధాలు, మండే పదార్థాలు లేదా చట్టవిరుద్ధమైన వస్తువులను తీసుకురావడంపై నిషేధం విధించారు. ఒకవేళ కార్యక్రమాన్ని చిత్రీకరించేందుకు డ్రోన్లను ఉపయోగించాలనుకుంటే, ముందుగానే ప్రత్యేక అనుమతి తీసుకోవడం తప్పనిసరి.

ఇటీవల ఢిల్లీ పోలీసులు జంతర్ మంతర్‌ను నిరసనల కోసం నిర్దేశించిన వేదిక జాబితా నుంచి తొలగించిన విషయం తెలిసిందే. దీనికి ప్రత్యామ్నాయంగా రామ్‌లీలా మైదానం, బురారీ మైదానం, సీబీడీ గ్రౌండ్‌లను గుర్తించారు. ఈ నేపథ్యంలోనే రామ్‌లీలా మైదానంలో కార్యక్రమాల నియంత్రణకు, ట్రాఫిక్ నిర్వహణకు, ప్రజా భద్రతకు ప్రాధాన్యతనిస్తూ ఈ కొత్త మార్గదర్శకాలను రూపొందించారు. పోలీసు హెడ్ క్వార్టర్స్ నుంచి ఆమోదం లభించిన వెంటనే ఈ నిబంధనలు అమల్లోకి రానున్నాయి.