గిద్దలూరులో మాజీ జవానుకు హనీట్రాప్

ప్రకాశం జిల్లా గిద్దలూరు పట్టణంలో ఓ మాజీ సైనికుడు హనీట్రాప్ ఉచ్చులో పడిన ఘటన ఆలస్యంగా వెలుగు చూసింది. గుర్తుతెలియని ఓ మహిళ లిఫ్ట్ అడిగి, ఆపై వలపు వల విసిరి ఆయనను బ్లాక్‌మెయిల్‌కు గురిచేసింది. ఈ ఘటనకు సంబంధించి బాధితుడు పోలీసులను ఆశ్రయించడంతో కేసు నమోదైంది.

వివరాల్లోకి వెళితే... గిద్దలూరు పట్టణానికి చెందిన ఓ మాజీ సైనికుడు నవంబర్ 9న తన ద్విచక్రవాహనంపై పీఆర్ కాలనీ నుంచి పట్టణంలోకి బయలుదేరారు. మార్గమధ్యంలో ఓ మహిళ ఆయనను లిఫ్ట్ అడిగి బైక్ ఎక్కింది. అనంతరం ఆమె ఆయనతో మాటలు కలిపి, ఆయనకు దగ్గరయింది. అనంతరం సన్నిహితంగా ఉంటూ కొన్ని వీడియోలను రికార్డ్ చేసింది. ఆ తర్వాత తన అసలు రూపాన్ని బయటపెట్టింది. ఆ ప్రైవేట్ వీడియోలను సామాజిక మాధ్యమాల్లో పోస్ట్ చేస్తానంటూ బాధితుడిని తీవ్రంగా బెదిరించడం మొదలుపెట్టింది.

ఆ వ్యవహారం బయటకు పొక్కకుండా ఉండాలంటే తనకు రూ.1.50 లక్షలు ఇవ్వాలని సదరు మహిళ డిమాండ్ చేసింది. ఆమె బెదిరింపులతో తీవ్ర ఆందోళనకు గురైన బాధితుడు, తప్పనిసరి పరిస్థితుల్లో తన ఫోన్‌పే ద్వారా సుమారు రూ.7 వేలు ఆమెకు పంపించారు. అయితే నిందితురాలి వేధింపులు కొనసాగడంతో, తాను హనీట్రాప్‌కు గురయ్యానని గ్రహించిన మాజీ జవాన్ చివరకు గిద్దలూరు పోలీసులను ఆశ్రయించి న్యాయం చేయాలని కోరారు.

బాధితుడు ఇచ్చిన ఫిర్యాదు మేరకు గిద్దలూరు అర్బన్ పోలీసులు కేసు నమోదు చేసి దర్యాప్తు ప్రారంభించారు. నిందితురాలి ఆచూకీని కనిపెట్టేందుకు పోలీసులు దర్యాప్తు ముమ్మరం చేశారు. ఈ ఘటన స్థానికంగా తీవ్ర చర్చనీయాంశంగా మారింది.