విడాకులు కాకముందే పెళ్లి చేసుకుంటానంటూ వేధింపులు.. హైదరాబాద్‌లో వ్యక్తిపై కేసు నమోదు

హైదరాబాద్‌ పరిధిలోని మేడిపల్లి పోలీస్ స్టేషన్ పరిధిలో ఓ మహిళపై వేధింపులకు పాల్పడుతున్న వ్యక్తిపై పోలీసులు కేసు నమోదు చేశారు. తన పెళ్లి ప్రతిపాదనను తిరస్కరించిందన్న అక్కసుతో నిందితుడు ఆమెకు పదేపదే ఫోన్లు చేస్తూ తీవ్ర అసభ్య పదజాలంతో దూషిస్తున్నాడని బాధితురాలు పోలీసులను ఆశ్రయించింది.

పోలీసులు తెలిపిన వివరాల ప్రకారం.. బోడుప్పల్ ప్రాంతానికి చెందిన 28 ఏళ్ల మహిళకు గతంలోనే వివాహం జరిగింది. అయితే వ్యక్తిగత కారణాల వల్ల ఆమె ప్రస్తుతం భర్తకు దూరంగా ఉంటోంది. దాదాపు ఏడాది క్రితం పీర్జాదిగూడలోని ఒక జాతీయ బ్యాంకు సమీపంలో ఆమెకు శ్రీనివాస్ అనే వ్యక్తితో పరిచయం ఏర్పడింది. ఆ పరిచయంతో వారిద్దరూ ఫోన్లలో మాట్లాడుకునేవారు.

ఈ క్రమంలో ఇటీవల శ్రీనివాస్ ఆమె ఇంటికి వెళ్లి, తనను పెళ్లి చేసుకోవాలని కోరాడు. అయితే మొదటి భర్త నుంచి తనకు ఇంకా అధికారికంగా విడాకులు రాలేదని, కాబట్టి ప్రస్తుతం మరో వివాహం చేసుకోవడం సాధ్యం కాదని బాధితురాలితో పాటు ఆమె తల్లిదండ్రులు స్పష్టం చేశారు. అతని ప్రతిపాదనను వారు పూర్తిగా తిరస్కరించారు.

పెళ్లికి నిరాకరించడాన్ని జీర్ణించుకోలేకపోయిన శ్రీనివాస్.. అప్పటి నుంచి ఆమెపై కక్ష పెంచుకున్నాడు. నిరంతరం ఫోన్ కాల్స్ చేస్తూ తీవ్రంగా వేధించడం మొదలుపెట్టాడు. ఫోన్ ఎత్తిన ప్రతిసారీ అసభ్యకరంగా మాట్లాడుతూ, తీవ్ర పదజాలంతో దూషిస్తూ మానసిక క్షోభకు గురిచేశాడు. అతని వేధింపులు రోజురోజుకూ మితిమీరిపోవడంతో, ఇక భరించలేకపోయిన బాధితురాలు మేడిపల్లి పోలీసులను ఆశ్రయించి లిఖితపూర్వకంగా ఫిర్యాదు చేసింది.

బాధితురాలి ఫిర్యాదును స్వీకరించిన మేడిపల్లి పోలీసులు నిందితుడు శ్రీనివాస్‌పై కేసు నమోదు చేశారు. ఈ వ్యవహారంపై దర్యాప్తు ప్రారంభించామని, నిందితుడిపై చట్టపరంగా తగిన చర్యలు తీసుకుంటామని పోలీసులు వెల్లడించారు.