'ఐఫోన్ 18 ప్రో మ్యాక్స్‌'తో టిమ్ కుక్ దీపావళి శుభాకాంక్షలు.. ఈసారి కూడా అదే సంప్రదాయం!

టెక్ దిగ్గజం యాపిల్ మాజీ సీఈఓ టిమ్ కుక్, ప్రపంచవ్యాప్తంగా దీపావళి పండుగ జరుపుకుంటున్న వారికి తన శుభాకాంక్షలు తెలిపారు. ప్రతి ఏటా భారతీయ పండుగలకు ప్రత్యేకంగా విషెస్ చెప్పే ఆయన, ఈసారి కూడా తన ఆనవాయితీని కొనసాగించారు. యాపిల్ నుంచి తాజాగా విడుదలైన ఫ్లాగ్‌షిప్ స్మార్ట్‌ఫోన్ ఐఫోన్ 18 ప్రో మ్యాక్స్‌తో తీసిన ఒక అద్భుతమైన చిత్రాన్ని పంచుకుంటూ ఆయన తన విషెస్‌ తెలియజేశారు.

సోషల్ మీడియా ప్లాట్‌ఫామ్ 'ఎక్స్‌' లో టిమ్ కుక్ ఒక పోస్ట్ చేశారు. "ప్రపంచవ్యాప్తంగా పండుగ జరుపుకుంటున్న ప్రతి ఒక్కరికీ దీపావళి శుభాకాంక్షలు! ఈ పండుగ కాంతులు మీ రాబోయే ఏడాదిని ప్రకాశవంతం చేయాలని కోరుకుంటున్నాను. ఈ చిత్రాన్ని గుర్సిమ్రన్ బస్రా ఐఫోన్ 18 ప్రో మ్యాక్స్‌తో తీశారు" అని ఆయన పేర్కొన్నారు. 

ఈ పోస్టులో పండుగ వాతావరణంలో ప్రకాశవంతంగా వెలుగుతున్న దీపం ఫొటోను జతచేశారు. ఈ ఫొటో ద్వారా ఒకవైపు పండుగ స్ఫూర్తిని పంచుతూనే, మరోవైపు తమ కొత్త ఐఫోన్ కెమెరా సామర్థ్యాన్ని ఆయన చాటిచెప్పారు.

భారతీయ పండుగలకు, ముఖ్యంగా దీపావళి, హోలీ పండుగలకు ఐఫోన్ యూజర్లు తీసిన ఫొటోలను పంచుకోవడం టిమ్ కుక్‌కు అలవాటుగా మారింది. ఇది పండుగ శుభాకాంక్షలు చెప్పడంతో పాటు తమ ఉత్పత్తుల ప్రచారానికి, ఫొటోగ్రాఫర్లను ప్రోత్సహించడానికి ఒక వేదికగా ఉపయోగపడుతోంది.

గతంలోనూ టిమ్ కుక్ ఇదే తరహాలో పోస్టులు చేశారు. 2025 దీపావళికి ముంబైకి చెందిన ఫొటోగ్రాఫర్ అపేక్ష మేకర్ ఐఫోన్ 17 ప్రో మ్యాక్స్‌తో తీసిన చిత్రాన్ని, 2024లో ఢిల్లీ ఫొటోగ్రాఫర్ రోహిత్ వోహ్రా ఐఫోన్ 16 ప్రో మ్యాక్స్‌తో తీసిన చిత్రాన్ని పంచుకున్నారు. ఆసక్తికరంగా ఈ ఏడాది ఫొటో తీసిన గుర్సిమ్రన్ బస్రా చిత్రాలను 2021 దీపావళి నాడు కూడా టిమ్ కుక్ పంచుకున్నారు. అప్పుడు ఐఫోన్ 13 ప్రో మ్యాక్స్‌తో తీసిన రెండు ఫొటోలను ఆయన షేర్ చేశారు.