ఏలూరులో ఓ ప్రభుత్వ అధికారి లంచం తీసుకుంటూ అవినీతి నిరోధక శాఖ (ఏసీబీ) అధికారులకు రెడ్‌హ్యాండెడ్‌గా పట్టుబడ్డారు. ఆంధ్రప్రదేశ్ కాలుష్య నియంత్రణ మండలి (ఏపీపీసీబీ) ఏలూరు ప్రాంతీయ కార్యాలయంలో ఎన్విరాన్‌మెంటల్ ఇంజినీర్‌గా పనిచేస్తున్న ఎ. సీతారామచంద్రమూర్తి, రూ. 30,000 లంచం స్వీకరిస్తుండగా ఏసీబీ అధికారులు వల పన్ని పట్టుకున్నారు.

ఏలూరు జిల్లా నవాబుపేట కాలనీకి చెందిన మత్తె బాబీ అనే వ్యక్తి ఇచ్చిన ఫిర్యాదు మేరకు ఏసీబీ అధికారులు కార్యాలయంపై దాడులు నిర్వహించారు. శుక్రవారం సాయంత్రం 5:55 గంటల సమయంలో ఏలూరు పవర్‌పేట రోడ్డులోని ఏపీపీసీబీ కార్యాలయంలో సీతారామచంద్రమూర్తి లంచం తీసుకుంటుండగా అధికారులు ఆయనను అదుపులోకి తీసుకున్నారు. ఈ ఘటనపై ఏలూరు ఏసీబీ రేంజ్ కార్యాలయంలో అవినీతి నిరోధక చట్టం-2018 సెక్షన్ 7 కింద కేసు నమోదు చేశారు.

నిందితుడు సీతారామచంద్రమూర్తి 2007లో అసిస్టెంట్ ఎన్విరాన్‌మెంటల్ ఇంజినీర్‌గా విధుల్లో చేరారు. వరంగల్, హైదరాబాద్, విశాఖపట్నం, కాకినాడ వంటి పలు ప్రాంతాల్లో పనిచేసిన ఆయన, 2025 జనవరిలో ఎన్విరాన్‌మెంటల్ ఇంజినీర్‌గా పదోన్నతి పొందారు. ప్రస్తుతం ఆయన ఏలూరులో విధులు నిర్వర్తిస్తున్నారు.

ఈ సందర్భంగా, ప్రభుత్వ కార్యాలయాల్లో ఎవరైనా అధికారులు లంచం డిమాండ్ చేస్తే నిర్భయంగా ఫిర్యాదు చేయాలని ఏసీబీ అధికారులు ప్రజలకు విజ్ఞప్తి చేశారు. టోల్‌ఫ్రీ నంబర్ 1064 లేదా 9440440057 మొబైల్ నంబర్‌కు కాల్ చేసి సమాచారం అందించవచ్చని, ఫిర్యాదుదారుల వివరాలను గోప్యంగా ఉంచుతామని వారు హామీ ఇచ్చారు.