పంచాయతీ నిధులను పప్పుబెల్లాల్లా వాడేశారు: వైసీపీపై అశోక్ బాబు ఫైర్

గత వైసీపీ ప్రభుత్వం గ్రామీణ వ్యవస్థను సర్వనాశనం చేసిందని మాజీ ఎమ్మెల్సీ పర్చూరి అశోక్ బాబు తీవ్రస్థాయిలో విమర్శించారు. కేంద్ర ప్రభుత్వం పంచాయతీల కోసం ఇచ్చిన కోట్ల రూపాయల నిధులను జగన్ దారి మళ్లించి పప్పుబెల్లాల్లా పంచిపెట్టారని ఆరోపించారు. కరోనా కష్టకాలంలో కనీసం బ్లీచింగ్ పౌడర్ చల్లేందుకు కూడా గ్రామాల్లో నిధులు లేకుండా చేసిన పాపం జగన్‌దేనని మండిపడ్డారు.

ఇంటింటికీ చెత్త పన్ను వేసి ప్రజలను పీడించారని, పన్ను కట్టనివారికి పింఛన్లు ఆపేస్తామని బెదిరించారని అశోక్ బాబు గుర్తుచేశారు. రూ. 3,000 కోట్ల ఉపాధి హామీ నిధులను వైసీపీ కార్యకర్తలు దోచుకున్నారని ఆరోపించారు. నాసిరకం మద్యం బ్రాండ్లతో గ్రామీణ ప్రజల జేబులు గుల్ల చేసి వారి ప్రాణాలతో చెలగాటమాడారని అన్నారు.

అయితే, కూటమి ప్రభుత్వం అధికారంలోకి రాగానే, గత ప్రభుత్వం రైతులకు ఎగ్గొట్టిన రూ.1,600 కోట్ల ధాన్యం బకాయిలను వారి ఖాతాల్లో జమ చేశామని తెలిపారు. ఇప్పుడు ధాన్యం కొనుగోలు చేసిన 24 గంటల్లోనే డబ్బులు చెల్లిస్తున్నామన్నారు. డిప్యూటీ సీఎం పవన్ కల్యాణ్ చొరవతో అటవీ ప్రాంతాల్లో రోడ్ల నిర్మాణం చేపట్టామని, మంత్రి నారా లోకేశ్ ఆధ్వర్యంలో పాఠశాలలను బలోపేతం చేస్తున్నామని చెప్పారు. తమ ప్రభుత్వ హయాంలో గ్రామాల్లో అభివృద్ధి పరుగులు పెడుతోందని... రేపటి జడ్పీటీసీ, ఎంపీటీసీ ఎన్నికల కౌంటింగ్‌లో కూడా కూటమి అభ్యర్థుల గెలుపు ఖాయమని అశోక్ బాబు ధీమా వ్యక్తం చేశారు.