విశ్రాంత ఐపీఎస్ అధికారి బాలసుబ్రహ్మణ్యం హఠాన్మరణం పట్ల ముఖ్యమంత్రి చంద్రబాబు నాయుడు తీవ్ర దిగ్భ్రాంతి వ్యక్తం చేశారు. ఆయన పార్థివదేహానికి నివాళులర్పించిన అనంతరం చంద్రబాబు మాట్లాడుతూ.. బాలసుబ్రహ్మణ్యం అత్యంత సమర్థుడైన, ప్రజాహితం కోరిన అధికారని కొనియాడారు. పదవీ విరమణ చేసిన రెండు నెలలకే ఆయన మృతి చెందడం అత్యంత బాధాకరమని ఆవేదన వ్యక్తం చేశారు.

బాలసుబ్రహ్మణ్యం మూడు దశాబ్దాల పాటు పోలీసు శాఖలో అందించిన సేవలను చంద్రబాబు గుర్తు చేసుకున్నారు. "ఉమ్మడి రాష్ట్రంలో జగిత్యాల లాంటి సమస్యాత్మక ప్రాంతాల్లో పనిచేసి మంచి పేరు తెచ్చుకున్నారు. ఆర్టీసీ ఎండీగా సంస్థను సమర్థంగా నడిపించారు. టెక్నాలజీపై ఆయనకు ఉన్న ఆసక్తితో 'ఈ-ప్రగతి' వంటి విప్లవాత్మక మార్పులు తీసుకువచ్చారు. ప్రతి విభాగంలోనూ తనదైన ముద్ర వేసి సంస్కరణలు అమలు చేశారు" అని చంద్రబాబు ప్రశంసించారు.

క్యాన్సర్‌తో పెద్ద యుద్ధమే చేస్తూ, చికిత్స పొందుతూ కూడా విధులను నిర్వర్తించారని సీఎం గుర్తుచేసుకున్నారు. రాష్ట్ర విభజన సమయంలో బాలసుబ్రహ్మణ్యం చాలా బాధపడ్డారని తెలిపారు. పోలీసు శాఖకు వన్నె తెచ్చిన గొప్ప అధికారిని కోల్పోయామని, ఆయన ఆత్మకు శాంతి కలగాలని భగవంతుడిని ప్రార్థిస్తున్నానని చంద్రబాబు పేర్కొన్నారు.