ఆంధ్రప్రదేశ్‌లో మున్సిపల్ ఎన్నికల సందర్భంగా రిగ్గింగ్, బూత్ కబ్జా ఆరోపణలు వెల్లువెత్తిన నేపథ్యంలో రాష్ట్ర ఎన్నికల సంఘం (SEC) కీలక నిర్ణయం తీసుకుంది. మూడు మున్సిపాలిటీల పరిధిలోని నాలుగు పోలింగ్ కేంద్రాల్లో ఈరోజు రీపోలింగ్ నిర్వహిస్తోంది. పోలింగ్ సందర్భంగా జరిగిన అక్రమాలపై జిల్లా కలెక్టర్లు, ఎన్నికల పరిశీలకుల నుంచి అందిన నివేదికలను క్షుణ్ణంగా పరిశీలించిన ఎస్ఈసీ ఈ మేరకు అధికారికంగా ఉత్తర్వులు జారీ చేసింది.

అనంతపురం కార్పొరేషన్‌లోని 30వ డివిజన్‌కు చెందిన ఒక పోలింగ్ కేంద్రం, పల్నాడు జిల్లా మాచర్ల మున్సిపాలిటీలోని 23వ వార్డులో ఒక కేంద్రం, ప్రకాశం జిల్లా చీమకుర్తి మున్సిపాలిటీలోని 14వ వార్డులో ఒక కేంద్రంలో రీపోలింగ్ జరుగుతోంది. సోమవారం ఉదయం 7 గంటలకు ప్రారంభమైన ఈ పోలింగ్, సాయంత్రం 5 గంటల వరకు కొనసాగనుంది.

గతంలో మాదిరిగా ఎలాంటి అవాంఛనీయ ఘటనలు పునరావృతం కాకుండా అధికారులు పటిష్ఠ బందోబస్తు ఏర్పాటు చేశారు. సమస్యాత్మక కేంద్రాల వద్ద భారీగా పోలీసు బలగాలను మోహరించడంతో పాటు, పూర్తిస్థాయి వెబ్ కాస్టింగ్, వీడియోగ్రఫీ నిఘా మధ్య ఓటర్లు తమ ఓటు హక్కును వినియోగించుకుంటున్నారు. ఈ రీపోలింగ్ ప్రక్రియ సాయంత్రంతో ముగియనుండగా, రాష్ట్రవ్యాప్తంగా జరిగిన అన్ని మున్సిపల్ ఎన్నికల ఓట్ల లెక్కింపును రేపు ఉదయం 8 గంటల నుంచి చేపట్టి, ఫలితాలను వెల్లడించనున్నారు.