ప్రముఖ ద్విచక్ర వాహన తయారీ సంస్థ హీరో మోటోకార్ప్‌ భారత మార్కెట్లోకి కొత్త స్కూటర్‌ ఎడిషన్‌ను తీసుకొచ్చింది. డెస్టినీ 110 క్లాసిక్‌ ఎడిషన్‌ పేరుతో దీన్ని విడుదల చేసింది. ఢిల్లీలో ఎక్స్‌షోరూమ్‌ ధరను రూ.76,400గా నిర్ణయించింది. పండగ సీజన్‌ను దృష్టిలో పెట్టుకుని కొత్త రంగులు, ప్రత్యేక డిజైన్‌ మార్పులతో ఈ ఎడిషన్‌ను అందుబాటులోకి తెచ్చింది. దేశవ్యాప్తంగా హీరో డీలర్‌షిప్‌లలో ఇది లభించనుంది.

ఈ స్కూటర్‌ రెండు డ్యూయల్‌ టోన్‌ రంగుల్లో లభిస్తుంది. మ్యాట్‌ గోల్డ్‌ఫిష్‌ సిల్వర్‌-లైట్‌ ఇండస్ట్రియల్‌ గ్రే రంగు కలయికతో పాటు బ్రౌన్‌ కలర్‌ ఇన్నర్‌ ప్యానెల్స్‌ ఒక ఆప్షన్‌గా ఉంది. మరోవైపు మ్యాట్‌ ఏరీస్‌ బ్రౌన్‌ రంగులో బ్లాక్‌ ఇన్నర్‌ ప్యానెల్స్‌తో రెండో ఆప్షన్‌ అందిస్తున్నారు. ముందు హ్యాండిల్‌ కవర్‌, పక్క ప్యానెల్స్‌పై కొత్త స్ట్రైప్స్‌, రంగులకు సరిపోయే అద్దాలు, సీటు, ప్రత్యేక 3డీ క్లాసిక్‌ ఎడిషన్‌ బ్యాడ్జ్‌, రిమ్‌ టేప్‌ వంటి మార్పులు చేశారు. 

డెస్టినీ 110లోని సౌకర్యాలను ఈ కొత్త ఎడిషన్‌లోనూ కొనసాగించారు. 785 మి.మీ. పొడవైన సీటు, ముందు వెనుక 12 అంగుళాల అల్లాయ్‌ వీల్స్‌, వెనుక వైపు వెడల్పైన టైర్‌ ఉన్నాయి. సీటు కింద 19 లీటర్ల స్టోరేజ్‌ స్థలం, మొబైల్‌ ఛార్జింగ్‌ సదుపాయంతో ముందు స్టోరేజ్‌ కంపార్ట్‌మెంట్‌, బూట్‌ ల్యాంప్‌ అందించారు. డిజిటల్‌-అనలాగ్‌ ఇన్‌స్ట్రుమెంట్‌ క్లస్టర్‌, ఎల్‌ఈడీ ప్రొజెక్టర్‌ హెడ్‌ల్యాంప్‌, ఎల్‌ఈడీ టెయిల్‌ ల్యాంప్‌ కూడా ఉన్నాయి. 

ఇంజిన్‌ విషయంలో ఎలాంటి మార్పులు చేయలేదు. పాత మోడల్‌లో ఉన్న 110.9 సీసీ సింగిల్‌ సిలిండర్‌ ఇంజిన్‌నే ఇందులో కొనసాగించారు. ఇది 7,250 ఆర్‌పీఎం వద్ద 8.15 పీఎస్‌ గరిష్ఠ శక్తిని, 5,750 ఆర్‌పీఎం వద్ద 8.7 ఎన్ఎం టార్క్‌ను ఉత్పత్తి చేస్తుంది. ఆటోమేటిక్‌ సీవీటీ గేర్‌బాక్స్‌తో పాటు హీరో ఐ3ఎస్‌ (ఐడిల్‌ స్టాప్‌-స్టార్ట్‌ సిస్టమ్‌) టెక్నాలజీని అందించారు. ఈ క్లాసిక్‌ ఎడిషన్‌ ధర ప్రస్తుత వీఎక్స్‌ వేరియంట్‌ కంటే రూ.1,400 ఎక్కువ.