నవంబర్ 5న ఒమన్‌లోని మస్కట్‌లో ప్రారంభం కానున్న ఏసీసీ పురుషుల అండర్-19 ఆసియా కప్ కోసం 15 మంది సభ్యులతో కూడిన భారత జట్టును బీసీసీఐ జూనియర్ క్రికెట్ కమిటీ శుక్రవారం ప్రకటించింది. ఈ మెగా టోర్నీలో భారత యువ జట్టుకు లక్ష్య రాయ్‌చందానీ కెప్టెన్‌గా, యశ్‌బర్ధన్ సింగ్ చౌహాన్ వైస్ కెప్టెన్‌గా వ్యవహరించనున్నారు. కొత్తగా నియమితులైన పర్వీందర్ అవానా నేతృత్వంలోని కమిటీ ఈ జట్టును ఎంపిక చేసింది.

ఈసారి ప్రకటించిన జట్టులో భారత క్రికెట్ దిగ్గజాల కుమారులు ఉండటం ప్రధాన ఆకర్షణగా నిలిచింది. భారత మాజీ డాషింగ్ ఓపెనర్ వీరేంద్ర సెహ్వాగ్ కుమారుడు ఆర్యవీర్ సెహ్వాగ్, మాజీ కెప్టెన్ రాహుల్ ద్రవిడ్ కుమారుడు అన్వయ్ ద్రవిడ్‌లకు జట్టులో చోటు దక్కింది. వికెట్ కీపర్‌గా అన్వయ్ ద్రవిడ్‌తో పాటు రజత్ బఘేల్ కూడా ఎంపికయ్యాడు.

ఇటీవల ముగిసిన వినూ మన్కడ్ ట్రోఫీలో అన్వయ్, ఆర్యవీర్ అద్భుత ప్రదర్శన కనబరిచారు. కర్ణాటక తరఫున ఆడిన అన్వయ్ ద్రవిడ్ కేవలం ఐదు ఇన్నింగ్స్‌లలోనే రెండు సెంచరీలు, ఒక అర్ధ సెంచరీతో సహా 358 పరుగులు సాధించి అద్భుత ఫామ్‌లో ఉన్నాడు.

మరోవైపు, ఢిల్లీ తరఫున ఆర్యవీర్ సెహ్వాగ్.. చండీగఢ్‌పై 143 బంతుల్లోనే 173 పరుగుల విధ్వంసకర ఇన్నింగ్స్ ఆడి సెలక్టర్ల దృష్టిని ఆకర్షించాడు. బౌలర్ ఇషాన్ సూద్ కూడా 8 మ్యాచ్‌ల్లో 13 వికెట్లు పడగొట్టి జట్టులో స్థానం సంపాదించాడు.

ఈ టోర్నమెంట్‌లో భారత్ గ్రూప్-ఏలో ఉంది. ఇదే గ్రూప్‌లో డిఫెండింగ్ ఛాంపియన్ పాకిస్థాన్, నేపాల్, యూఏఈ జట్లు ఉన్నాయి. గ్రూప్-బిలో బంగ్లాదేశ్, శ్రీలంక, ఆఫ్ఘ‌నిస్థాన్, మలేసియా పోటీపడనున్నాయి. ప్రతి గ్రూప్ నుంచి టాప్-2 జట్లు సెమీఫైనల్స్‌కు అర్హత సాధిస్తాయి. 

సెమీస్ మ్యాచ్‌లు నవంబర్ 12న, ఫైనల్ నవంబర్ 14న జరుగుతుంది. భారత జట్టు నవంబర్ 6న నేపాల్‌తో తమ తొలి మ్యాచ్ ఆడనుంది. చిరకాల ప్రత్యర్థి పాకిస్థాన్‌తో నవంబర్ 8న, యూఏఈతో నవంబర్ 10న గ్రూప్ దశ మ్యాచ్‌లలో తలపడనుంది.

అండర్-19 ఆసియా కప్ చరిత్రలో 8 సార్లు టైటిల్ గెలిచి భారత్ అత్యంత విజయవంతమైన జట్టుగా కొనసాగుతోంది. అయితే, గత ఎడిషన్ ఫైనల్‌లో పాకిస్థాన్ చేతిలో 191 పరుగుల భారీ తేడాతో ఓటమిపాలై రన్నరప్‌తో సరిపెట్టుకుంది. ఈసారి ఆ ఓటమికి బదులు తీర్చుకోవాలని యువ భారత్ పట్టుదలగా ఉంది. ఇటీవల ఆస్ట్రేలియాతో జరిగిన వన్డే (3-0), టెస్ట్ (2-0) సిరీస్‌లను క్లీన్‌స్వీప్ చేయడం జట్టు ఆత్మవిశ్వాసాన్ని పెంచుతోంది.

భారత అండర్-19 జట్టు: లక్ష్య రాయ్‌చందానీ (కెప్టెన్), యశ్‌బర్ధన్ సింగ్ చౌహాన్ (వైస్ కెప్టెన్), ఆర్యవీర్ సెహ్వాగ్, వి.కె. వినీత్, కుశాగ్ర ఓఝా, అర్జున్ రాజ్‌పుత్, మనల్ చౌహాన్, అన్వయ్ ద్రవిడ్ (వికెట్ కీపర్), రజత్ బఘేల్ (వికెట్ కీపర్), వి. యశ్‌వీర్, ఆర్యన్ సవ్సానీ, మోహిత్ ఉల్వా, కావ్య పటేల్, షావిన్ వినోద్, ఇషాన్ సూద్.