తొమ్మిదేళ్ల విరామం తర్వాత మళ్లీ 'కాంగ్రెస్' వైపు వాఘేలా.. అధిష్ఠానం నిర్ణయంపై ఉత్కంఠ

గుజరాత్ రాజకీయాల్లో కీలక పరిణామాలు చోటుచేసుకుంటున్నాయి. రాష్ట్ర మాజీ ముఖ్యమంత్రి, సీనియర్ నేత శంకర్‌సింహ్‌ వాఘేలా తొమ్మిదేళ్ల విరామం తర్వాత తిరిగి కాంగ్రెస్ పార్టీలో చేరేందుకు సిద్ధమవుతున్నారు. 2027 అసెంబ్లీ ఎన్నికల్లో బీజేపీని గద్దె దించడమే లక్ష్యంగా తాను కాంగ్రెస్‌లో చేరడానికి సిద్ధమని ఆయన ప్రకటించారు. ఈ మేరకు పార్టీ పెద్దలతో చర్చలు తుది దశకు చేరుకున్నాయని, అయితే రాహుల్ గాంధీతో భేటీ తర్వాతే తన చేరికపై తుది నిర్ణయం ఉంటుందని స్పష్టం చేశారు.

86 ఏళ్ల వాఘేలా ఇప్పటికే ఏఐసీసీ గుజరాత్ ఇన్‌ఛార్జ్ రణ్‌దీప్ సూర్జేవాలా, రాష్ట్ర కాంగ్రెస్ అధ్యక్షుడు అమిత్ చావ్డా, కేంద్ర మాజీ మంత్రి భరత్‌సింహ్‌ సోలంకి వంటి నేతలతో చర్చలు జరిపారు. "బీజేపీ ప్రభుత్వాన్ని గద్దె దించడానికి నేను కాంగ్రెస్‌లో చేరడానికి సిద్ధంగా ఉన్నాను. రాబోయే అసెంబ్లీ ఎన్నికలే నాకు చివరి అవకాశం. బీజేపీకి వ్యతిరేకంగా పోరాడటంలో నా వంతు పాత్ర పోషించాలనుకుంటున్నాను" అని వాఘేలా పేర్కొన్నారు. పార్టీ నుంచి తాను ఏమీ ఆశించడం లేదని, పార్టీకి తన వంతు సహకారం అందించడానికే వస్తున్నానని ఆయన తెలిపారు.

వాఘేలాతో చర్చలు జరుగుతున్న విషయాన్ని గుజరాత్ కాంగ్రెస్ అధ్యక్షుడు అమిత్ చావ్డా కూడా ధ్రువీకరించారు. బీజేపీ పాలనపై అసంతృప్తితో ఉన్న పలువురు నేతలు కాంగ్రెస్ వైపు చూస్తున్నారని.. వాఘేలా, ఆయన మద్దతుదారులతో సంప్రదింపులు జరుపుతున్నామని తెలిపారు.

2017లో కాంగ్రెస్ పార్టీని వీడిన వాఘేలా, మళ్లీ ఇన్నాళ్లకు సొంత గూటికి చేరాలని నిర్ణయించుకున్నారు. వాస్తవానికి, అక్టోబర్ 2న తన సొంత పార్టీ 'ప్రజా శక్తి డెమోక్రటిక్ పార్టీ' (PSDP)ని పునరుద్ధరించాలని భావించినప్పటికీ, కాంగ్రెస్‌తో చర్చల నేపథ్యంలో ఆ కార్యక్రమాన్ని వాయిదా వేసుకున్నారు. వాఘేలా కుమారుడు మహేంద్రసింహ్‌ వాఘేలా 2022లోనే కాంగ్రెస్‌లో చేరిన విషయం తెలిసిందే. ప్రస్తుతం వాఘేలా చేరికపై తుది నిర్ణయం కాంగ్రెస్ అధిష్ఠానం చేతిలో ఉంది. రాహుల్ గాంధీతో సమావేశం తర్వాత దీనిపై పూర్తి స్పష్టత వచ్చే అవకాశం ఉంది.