తెలంగాణలో ఇకపై డ్రైవింగ్ లైసెన్స్ పొందడం అంత సులువు కాదు. రహదారి భద్రతను పెంచి, ప్రమాదాలను తగ్గించే లక్ష్యంతో రవాణా శాఖ కీలకమైన మార్పులకు శ్రీకారం చుట్టింది. లైసెన్స్ కోసం దరఖాస్తు చేసుకునే వారు ఇకపై తప్పనిసరిగా ఆన్‌లైన్‌లో రెండున్నర గంటల వీడియో కోర్సు పూర్తి చేసి, ఆ తర్వాత నిర్వహించే పరీక్షలో ఉత్తీర్ణత సాధించాల్సి ఉంటుంది. ఈ కొత్త విధానాన్ని త్వరలోనే రాష్ట్రవ్యాప్తంగా అమలు చేయాలని అధికారులు నిర్ణయించారు.

లెర్నర్ లైసెన్స్ రిజిస్ట్రేషన్ (ఎల్ఎల్ఆర్) చేసుకున్న ప్రతి ఒక్కరూ ఈ ఆన్‌లైన్ కోర్సులో పాల్గొనాలి. మొత్తం రెండున్నర గంటల నిడివి గల ఈ కోర్సును 25 నిమిషాల చొప్పున 6 మాడ్యూల్స్‌గా విభజించారు. ఇందులో 64 రహదారి భద్రతా నియమాలు, ప్రాక్టికల్ డ్రైవింగ్ పాఠాలు ఉంటాయి. అభ్యర్థి మోసాలకు పాల్పడకుండా ఫేస్ రికగ్నిషన్ టెక్నాలజీతో పర్యవేక్షిస్తారు. ప్రతి మాడ్యూల్ తర్వాత ఒక క్విజ్, మొత్తం కోర్సు పూర్తయ్యాక తుది పరీక్ష ఉంటుంది. ఈ పరీక్షలో పాసైతేనే రెగ్యులర్ డ్రైవింగ్ లైసెన్స్ టెస్ట్ కోసం స్లాట్ బుక్ చేసుకునేందుకు అర్హత లభిస్తుంది.

ఇప్పటికే ఈ విధానాన్ని కూకట్‌పల్లి ఆర్టీఏ కార్యాలయంలో పైలట్ ప్రాజెక్టుగా అమలు చేయగా మంచి ఫలితాలు వచ్చాయి. అక్కడ సుమారు 3,400 మంది ఎల్‌ఎల్‌ఆర్ దరఖాస్తుదారులు ఉండగా, వారిలో 2,800 మంది ఈ కోర్సును పూర్తి చేశారు. ఈ విజయంతో మరో 30 నుంచి 45 రోజుల్లో కోర్ అర్బన్ రీజియన్ (క్యూర్) పరిధిలో, ఆ తర్వాత రాష్ట్రమంతటా అమలు చేసేందుకు అధికారులు ఏర్పాట్లు చేస్తున్నారు.

ఆస్ట్రేలియా, యూకే, అమెరికా వంటి దేశాల్లోని ఉత్తమ విధానాలను స్ఫూర్తిగా తీసుకుని ఈ కోర్సును రూపొందించారు. దీని ద్వారా వాహనదారుల్లో రహదారి నిబంధనలపై పూర్తి అవగాహన కల్పించి, ప్రమాదాలను గణనీయంగా తగ్గించవచ్చని అధికారులు ఆశాభావం వ్యక్తం చేస్తున్నారు. ఈ వీడియోలు తెలుగు, ఇంగ్లీష్, హిందీ భాషల్లో అందుబాటులో ఉంటాయి.