9/11 దాడుల తర్వాత 25 ఏళ్లకు... వరల్డ్ ట్రేడ్ సెంటర్ వద్ద చివరి టవర్ నిర్మాణం ప్రారంభం

ప్రపంచాన్ని దిగ్భ్రాంతికి గురిచేసిన 9/11 ఉగ్రదాడులు జరిగి 25 ఏళ్లు పూర్తవుతున్న తరుణంలో, న్యూయార్క్‌లోని వరల్డ్ ట్రేడ్ సెంటర్ (డబ్ల్యూటీసీ) ప్రాంగణంలో చివరి కమర్షియల్ ఆఫీస్ టవర్ నిర్మాణ పనులు అధికారికంగా ప్రారంభమయ్యాయి. లోయర్ మాన్‌హట్టన్‌లోని 200 గ్రీన్‌విచ్ స్ట్రీట్‌లో '2 వరల్డ్ ట్రేడ్ సెంటర్' పేరుతో నిర్మిస్తున్న ఈ భవనం, ప్రముఖ ఆర్థిక సేవల సంస్థ 'అమెరికన్ ఎక్స్‌ప్రెస్' గ్లోబల్ హెడ్‌క్వార్టర్స్‌గా సేవలందించనుంది.

ఈ టవర్ 55 అంతస్తులతో, 1,226 అడుగుల (సుమారు 373 మీటర్లు) ఎత్తులో నిర్మితం కానుంది. సిల్వర్‌స్టీన్ ప్రాపర్టీస్ ఈ ప్రాజెక్టును అభివృద్ధి చేస్తుండగా, పోర్ట్ అథారిటీ ఆఫ్ న్యూయార్క్ అండ్ న్యూజెర్సీ భూమిని సమకూరుస్తోంది. దాదాపు 2 మిలియన్ చదరపు అడుగుల విస్తీర్ణంలో రూపుదిద్దుకుంటున్న ఈ భవనాన్ని పూర్తిగా అమెరికన్ ఎక్స్‌ప్రెస్ సంస్థే వినియోగించుకోనుంది. 2031 నాటికి ఈ భవనం పూర్తిస్థాయిలో అందుబాటులోకి వస్తుందని అంచనా.

9/11 దాడుల అనంతరం ఆర్కిటెక్ట్ డేనియల్ లిబ్‌స్కిండ్ రూపొందించిన మాస్టర్ ప్లాన్‌లో ఇదే చివరి ప్రధాన వాణిజ్య భవనం. ప్రణాళికలు, నిధుల సమీకరణలో ఏర్పడిన జాప్యం కారణంగా గత 15 ఏళ్లుగా ఈ స్థలం పునాదుల దశకే పరిమితమైంది. సమీపంలోని నేషనల్ సెప్టెంబర్ 11 మెమోరియల్ అండ్ మ్యూజియంపై తగినంత సూర్యరశ్మి ప్రసరించేలా, బ్రిటిష్ నిర్మాణ సంస్థ 'ఫోస్టర్ + పార్ట్‌నర్స్' దీనిని ప్రత్యేకంగా డిజైన్ చేసింది.

ఈ ప్రాజెక్ట్ ద్వారా నిర్మాణ రంగంలో 2,000కు పైగా ఉద్యోగాలు, మరో 3,200 ప్రత్యక్ష, పరోక్ష ఉపాధి అవకాశాలు లభిస్తాయని భావిస్తున్నారు. దీనివల్ల నగర ఆర్థిక వ్యవస్థకు 5.9 బిలియన్ల డాలర్లు, రాష్ట్రానికి 6.3 బిలియన్ డాలర్ల మేర ప్రయోజనం చేకూరనుంది. స్మార్ట్ బిల్డింగ్ టెక్నాలజీ, పూర్తిస్థాయి ఎలక్ట్రిక్ హీటింగ్, కూలింగ్ సిస్టమ్స్‌తో పాటు పర్యావరణహిత నిర్మాణ సామగ్రిని ఇందులో వినియోగిస్తున్నారు. '2 డబ్ల్యూటీసీ' నిర్మాణం పూర్తయితే, గ్రౌండ్ జీరో వాణిజ్య పునరాభివృద్ధి ప్రక్రియలో ఒక కీలక ఘట్టం పూర్తయినట్లవుతుంది.