ఇన్‌స్టాగ్రామ్‌లో కొత్త ఫీచర్‌.. ట్యాగ్‌ చేసిన పోస్టులను ఇక ప్రొఫైల్‌లోనూ చూపించొచ్చు!

ఇన్‌స్టాగ్రామ్‌ వినియోగదారులకు కొత్త సదుపాయాన్ని అందుబాటులోకి తీసుకొచ్చింది. ఇకపై ఇతరులు తమను ట్యాగ్‌ చేసిన పోస్టుల్లో నచ్చిన వాటిని నేరుగా మెయిన్‌ ప్రొఫైల్‌ గ్రిడ్‌లో చూపించుకునే అవకాశం ఉంటుంది. ఈ ఫీచర్‌ను ప్రపంచవ్యాప్తంగా దశలవారీగా అందుబాటులోకి తెస్తున్నట్లు ఇన్‌స్టాగ్రామ్‌ అధిపతి ఆడమ్‌ మొస్సేరి తెలిపారు.

ఇప్పటివరకు యూజర్లు ట్యాగ్‌ అయిన పోస్టులను ప్రత్యేకంగా ఉండే ‘ట్యాగ్డ్‌’ విభాగంలో చూడాల్సి వచ్చేది. కొత్త ఫీచర్‌తో తమకు నచ్చిన ట్యాగ్‌ చేసిన పోస్టులను మెయిన్‌ ప్రొఫైల్‌ గ్రిడ్‌లోకి కూడా చేర్చుకోవచ్చు.

ట్యాగ్‌ చేసిన పోస్టును మెయిన్‌ గ్రిడ్‌లోకి తీసుకురావడానికి మూడు మార్గాలను ఇన్‌స్టాగ్రామ్‌ అందిస్తోంది. ట్యాగ్‌ అయినప్పుడు వచ్చే డైరెక్ట్‌ మెసేజ్‌ నోటిఫికేషన్‌ నుంచే ఈ ఆప్షన్‌ను ఎంచుకోవచ్చు. అలాగే ట్యాగ్‌ చేసిన పోస్టులోని మూడు చుక్కల మెనూను ఓపెన్‌ చేసి పోస్టును మెయిన్‌ గ్రిడ్‌లో చేర్చుకోవచ్చు. మరో మార్గంగా ‘Tagged’ విభాగంలో ఉన్న పోస్టుపై కొద్దిసేపు నొక్కి ఉంచి ఈ ఆప్షన్‌ను ఎంచుకోవచ్చు.

మెయిన్‌ గ్రిడ్‌లోకి కొత్తగా చేర్చిన పోస్టులు సాధారణంగా తాజా పోస్టులు ముందుగా కనిపించే క్రమంలో చేరతాయి. ఇప్పటికే ప్రొఫైల్‌ గ్రిడ్‌ను తమకు నచ్చిన విధంగా మార్చుకున్నవారు అదే అమరికను కొనసాగించుకోవచ్చు.

మరో ముఖ్యమైన విషయం ఏమిటంటే.. ట్యాగ్‌ చేసిన పోస్టును ప్రొఫైల్‌ గ్రిడ్‌లోకి చేర్చడం వల్ల అసలు పోస్టులో ఎలాంటి మార్పు ఉండదు. తర్వాత ఎప్పుడైనా దాన్ని మెయిన్‌ గ్రిడ్‌ నుంచి తొలగించవచ్చు. అలా చేసినా అసలు పోస్టు డిలీట్‌ కాదు. ‘Tagged’ విభాగంలోనూ అది కొనసాగుతుంది.

గ్రూప్‌ ఫొటోలు, క్రియేటర్‌ కొలాబరేషన్స్‌, ప్రత్యేక జ్ఞాపకాలు వంటి ట్యాగ్‌ చేసిన పోస్టులను ప్రొఫైల్‌లో ప్రదర్శించుకోవాలనుకునే వారికి ఈ ఫీచర్‌ ఉపయోగపడనుంది. అయితే ప్రతి ఖాతాకు ఈ సదుపాయం ఎప్పటికి పూర్తిగా అందుబాటులోకి వస్తుందనే విషయాన్ని ఇన్‌స్టాగ్రామ్‌ స్పష్టంగా వెల్లడించలేదు.