అమెరికా, ఇరాన్ మధ్య ఘర్షణ మరోసారి తీవ్రరూపం దాల్చింది. తమ యుద్ధనౌకపై ఇరాన్ రెండుసార్లు బాలిస్టిక్ క్షిపణులతో దాడికి యత్నించిందని ఆరోపిస్తూ, అమెరికా బలగాలు ఇరాన్‌కు చెందిన ఐదు భారీ ఆయిల్ ట్యాంకర్లను ధ్వంసం చేశాయి. దీనికి ప్రతీకారంగా ఇరాన్.. జోర్డాన్‌లోని అమెరికా సైనిక స్థావరంపై క్షిపణులతో దాడి చేసింది. ఈ దాడులు-ప్రతిదాడులతో గల్ఫ్ ప్రాంతం దద్దరిల్లింది.

యూఎస్ సెంట్రల్ కమాండ్ (సెంట్‌కామ్) కథనం ప్రకారం.. మంగళవారం ఒమన్ గల్ఫ్‌లో కావిజ్, చార్మినార్, హొరైజన్ 1, రీస్కో అనే నాలుగు ట్యాంకర్లతో పాటు, ఇరాన్ ప్రధాన చమురు ఎగుమతి కేంద్రమైన ఖర్గ్ ద్వీపం సమీపంలో ఉన్న దర్యా అనే మరో ట్యాంకర్‌ను లక్ష్యంగా చేసుకుని దాడులు జరిపారు. దాడికి ముందు ట్యాంకర్లలోని సిబ్బందిని నౌకలను విడిచి వెళ్లాలని ఆదేశించామని, ఆ తర్వాతే వాటిని పనిచేయకుండా ధ్వంసం చేశామని అమెరికా సైన్యం తెలిపింది. ఇరాన్ ఇస్లామిక్ రివల్యూషనరీ గార్డ్ కార్ప్స్ (ఐఆర్‌జీసీ), దాని అనుబంధ సంస్థలకు నిధులు సమకూర్చేందుకు ఈ ట్యాంకర్లను ఉపయోగిస్తున్నారని అమెరికా ఆరోపించింది. ఈ ఘటనలో తమ సిబ్బందికి ఎలాంటి హాని జరగలేదని, ఇరాన్ క్షిపణి దాడుల నుంచి తమ యుద్ధనౌక సురక్షితంగా బయటపడిందని సెంట్‌కామ్ పేర్కొంది.

అమెరికా చర్యకు ప్రతిగా ఇరాన్ వెంటనే స్పందించింది. జోర్డాన్‌లోని అల్ అజ్రాక్ వైమానిక స్థావరం (మువఫాక్ సాల్టి ఎయిర్‌బేస్)పై క్షిపణి దాడులు జరిపినట్లు ఐఆర్‌జీసీ ప్రకటించింది. ఈ స్థావరంలోని ఫైటర్ ఎయిర్‌క్రాఫ్ట్ నిర్వహణ, సంసిద్ధత ప్రాంతాలను, షెల్టర్లను లక్ష్యంగా చేసుకున్నామని ఇరాన్ తెలిపింది. అయితే, ఇరాన్ ప్రయోగించిన 20 బాలిస్టిక్ క్షిపణులలో 18 క్షిపణులను తమ వాయు రక్షణ వ్యవస్థలు కూల్చివేశాయని జోర్డాన్ సైన్యం వెల్లడించింది. మిగిలిన రెండు జనావాసాలు లేని ప్రాంతాల్లో పడ్డాయని, ఎలాంటి ప్రాణనష్టం గానీ, ఆస్తినష్టం గానీ జరగలేదని స్పష్టం చేసింది.

మరోవైపు, కువైట్, బహ్రెయిన్ ఓడరేవుల సమీపంలోని ఆయిల్ ట్యాంకర్ల సిబ్బందికి ఇరాన్ తీవ్ర హెచ్చరికలు జారీ చేసింది. వెంటనే నౌకలను విడిచి వెళ్లాలని, లేదంటే వాటిని లక్ష్యంగా చేసుకుంటామని హెచ్చరించింది. ఈ వరుస పరిణామాల నేపథ్యంలో, కీలకమైన హర్మూజ్ జలసంధి ద్వారా చమురు రవాణాపై ఆందోళనలు పెరిగాయి. దీంతో బ్రెంట్ క్రూడ్ ఆయిల్ ధర బ్యారెల్‌కు 100 డాలర్లకు చేరువైంది. గత ఆరు నెలలుగా కొనసాగుతున్న ఈ ఘర్షణలో ఇది తాజా ఉదంతం. ఇరాన్ దాడులను తాము ఎదుర్కొంటూనే ఉంటామని, ప్రతిస్పందనగా వారి ఆయిల్ ట్యాంకర్లనే లక్ష్యంగా చేసుకుంటామని అమెరికా అధికారులు హెచ్చరికలు జారీచేశారు.