భారత బైక్‌ను మెచ్చిన బ్రిటన్ మాజీ ప్రధాని.. ఆనంద్ మహీంద్రా ఆసక్తికర పోస్ట్!

బ్రిటన్ మాజీ ప్రధాని బోరిస్ జాన్సన్, పూర్తిగా భారత్‌లో తయారైన ఒక క్లాసిక్ మోటార్‌సైకిల్‌పై చక్కర్లు కొడుతున్న వీడియో ప్రస్తుతం సోషల్ మీడియాలో అందరి దృష్టిని ఆకర్షిస్తోంది. మహీంద్రా గ్రూప్ ఛైర్మన్ ఆనంద్ మహీంద్రా ఈ వీడియోను పంచుకోవడంతో, ఒకప్పటి బ్రిటిష్ బ్రాండ్ అయిన బీఎస్ఏ ఇప్పుడు భారత యాజమాన్యంలో ఎలా పునరుజ్జీవం పొందిందో మరోసారి చర్చనీయాంశమైంది.

ఈ వీడియోలో బోరిస్ జాన్సన్, తాను నడుపుతున్నది భారత్‌లో తయారైన 'బర్మింగ్‌హామ్ స్మాల్ ఆర్మ్స్' (బీఎస్ఏ) బాంటమ్ బైక్ అని తెలిపారు. ఇది 'ఆంగ్లో-ఇండియన్ సాంకేతిక సహకారానికి' ఒక బలమైన ఉదాహరణ అని ఆయన అభివర్ణించారు. అనంతరం ఓ పచ్చిక బయలులో ఆ బైక్‌ను నడుపుతూ కనిపించారు.

ఈ వీడియోను తన 'ఎక్స్‌' ఖాతాలో షేర్ చేసిన ఆనంద్ మహీంద్రా, బోరిస్ జాన్సన్‌కు ధన్యవాదాలు తెలిపారు. "మేము పునరుద్ధరించి, ఇప్పుడు భారత్‌లో నిర్మిస్తున్న బైక్‌ను మీరు ఆస్వాదిస్తున్నందుకు సంతోషంగా ఉంది" అని పేర్కొన్నారు. అంతేగాక జాన్సన్ పేరులోని మొదటి అక్షరాలను ఉద్దేశించి.. "ఇకపై బీఎస్ఏను 'బోరిస్ స్మాల్ ఆర్మ్స్' కంపెనీగా మార్చరని ఆశిస్తున్నాం" అంటూ చమత్కరించారు.

బీఎస్ఏ చరిత్ర.. భారత యాజమాన్యం
వాస్తవానికి బీఎస్ఏ (బర్మింగ్‌హామ్ స్మాల్ ఆర్మ్స్) అనేది ఒకప్పటి ప్రముఖ బ్రిటిష్ మోటార్‌సైకిల్ తయారీ సంస్థ. కాలక్రమేణా కనుమరుగైన ఈ బ్రాండ్‌ను భారత పారిశ్రామిక దిగ్గజం మహీంద్రా గ్రూప్ కొనుగోలు చేసింది. జావా, యెజ్డీ వంటి బ్రాండ్లను నిర్వహిస్తున్న 'క్లాసిక్ లెజెండ్స్' సంస్థ ద్వారానే బీఎస్ఏ బైక్‌లను కూడా మహీంద్రా తయారు చేస్తోంది.

చారిత్రాత్మకంగా చూస్తే, ఒరిజినల్ బీఎస్ఏ బాంటమ్ బైక్‌ను 1948 నుంచి 1971 మధ్య బ్రిటన్‌లో ఉత్పత్తి చేసేవారు. అప్పట్లో ఇది 123cc నుంచి 173cc ఇంజిన్లతో లభించే తేలికపాటి టూ-స్ట్రోక్ మోటార్‌సైకిల్‌గా పేరుగాంచింది.

ఆధునిక బాంటమ్ విశేషాలు
ప్రస్తుతం వస్తున్న కొత్త బాంటమ్, పాత పేరును స్ఫూర్తిగా తీసుకున్నప్పటికీ ఇది పూర్తిగా ఆధునిక రోడ్‌స్టర్. ఇందులో 344cc, లిక్విడ్-కూల్డ్, సింగిల్-సిలిండర్ ఇంజిన్‌ను అమర్చారు. ఇది 29 hp శక్తిని, 29 Nm టార్క్‌ను ఉత్పత్తి చేస్తుంది. 6-స్పీడ్ గేర్‌బాక్స్, రెండు చక్రాలకు డిస్క్ బ్రేకులు, ఏబీఎస్ వంటి ఆధునిక ఫీచర్లు ఉన్నాయి. డిజైన్ పరంగా క్లాసిక్ లుక్‌తో పాటు సింగిల్-పీస్ సీటు, గుండ్రని ఎల్ఈడీ హెడ్‌ల్యాంప్ వంటివి ప్రత్యేక ఆకర్షణగా నిలుస్తాయి.

భారత్‌లో తయారీ.. విదేశాల్లో అమ్మకం
బీఎస్ఏ మూలాలు బ్రిటన్‌లో ఉన్నప్పటికీ, కొత్త బాంటమ్ బైక్‌ను పూర్తిగా భారత్‌లోనే తయారు చేసి అంతర్జాతీయ మార్కెట్లకు ఎగుమతి చేస్తున్నారు. యూకే, యూరప్ మార్కెట్లలో ఇది అమ్మకానికి అందుబాటులో ఉంది. యూకేలో దీని ధర 3,499 పౌండ్లు, అంటే భారత కరెన్సీలో సుమారు రూ. 4.5 లక్షలు. 

అయితే, ఆసక్తికరమైన విషయం ఏమిటంటే.. ఈ మోడల్ ప్రస్తుతం భారత మార్కెట్లో అమ్మకానికి లేదు. మనదేశంలో బీఎస్ఏ బ్రాండ్ కింద గోల్డ్ స్టార్, 650 స్క్రాంబ్లర్ వంటి ఇతర మోడళ్లు మాత్రమే అందుబాటులో ఉన్నాయి. భారత్‌తో పాటు యూకే, తుర్కియే, న్యూజిలాండ్, జర్మనీ, ఫ్రాన్స్, ఇటలీ, అమెరికా, ఆస్ట్రేలియా, జపాన్ వంటి అనేక దేశాల్లో బీఎస్ఏ తన కార్యకలాపాలను విస్తరించింది.