ఢిల్లీ అల్లర్ల కేసు: ఉమర్ ఖలీద్, షర్జీల్ ఇమామ్లకు మళ్లీ చుక్కెదురు
- విచారణ లేకుండా ఆరేళ్లుగా జైల్లో ఉన్నామని నిందితుల వాదన
- పిటిషన్లు విచారణార్హం కావంటూ కొట్టివేసిన కర్కర్డూమా కోర్టు
- ఉపా చట్టం కింద నమోదైన ఈ కేసులో కొనసాగుతున్న నిర్బంధం
విచారణ ప్రారంభం కాకుండానే తాము దాదాపు ఆరేళ్లుగా జైలులో ఉన్నామని, ఇది తమ ప్రాథమిక హక్కులను ఉల్లంఘించడమేనని నిందితులు తమ పిటిషన్లలో పేర్కొన్నారు. సుప్రీంకోర్టు ఆదేశించిన ఆరు నెలలు గడువు ముగిసినప్పటికీ, కేసు విచారణలో ఎటువంటి పురోగతి లేదని వారు కోర్టు దృష్టికి తీసుకెళ్లారు.
2020 ఫిబ్రవరిలో చోటుచేసుకున్న ఈ హింసాత్మక అల్లర్లలో 53 మంది ప్రాణాలు కోల్పోయారు. ఈ ఘటనల వెనుక లోతైన కుట్ర దాగి ఉందన్న ఆరోపణలతో ఢిల్లీ పోలీసులు చట్టవ్యతిరేక కార్యకలాపాల నిరోధక చట్టం (ఉపా) కింద కేసు నమోదు చేశారు. పౌరసత్వ సవరణ చట్టానికి (సీఏఏ) వ్యతిరేకంగా చేపట్టిన నిరసనల్లో కీలక పాత్ర పోషించిన జేఎన్యూ మాజీ విద్యార్థులు ఉమర్ ఖలీద్, షర్జీల్ ఇమామ్లను ఈ కేసులో అరెస్టు చేశారు.
ఈ ఏడాది జనవరిలో సుప్రీంకోర్టు సైతం వీరి బెయిల్ అభ్యర్థనను తోసిపుచ్చింది. అయితే, ఏడాది తర్వాత లేదా కీలక సాక్షుల విచారణ పూర్తయిన అనంతరం తిరిగి బెయిల్ కోసం దరఖాస్తు చేసుకునే వెసులుబాటు కల్పించింది. ఈ క్రమంలోనే వారు జూన్ నెలలో తాజా పిటిషన్లు దాఖలు చేశారు.
కాగా, గత తీర్పులకు సంబంధించిన కొన్ని అంశాలు ప్రస్తుతం విస్తృత ధర్మాసనం పరిశీలనలో ఉన్నందున, ఈ దశలో ఈ బెయిల్ పిటిషన్లు విచారణకు అర్హమైనవి కావని కోర్టు అభిప్రాయపడింది.
